ព្យុះព្រិលខ្លាំងនិងយ៉ាងគំហុក បានធ្វើឲ្យអ្នកស្រុកនៅភាគខាងត្បូងប្រទេសបូលីវីស្រឡាំងកាំងកាលពីថ្ងៃព្រហស្បតិ៍ ទី១៦ ខែតុលា ដែលព្យុះព្រិលនេះបានបណ្តាលឱ្យមានទឹកជំនន់នៅតាមដងផ្លូវនិងបង្ខំឱ្យប្រជាជនត្រូវបោសសម្អាតដុំព្រិលចេញ។

យោងតាមសេចក្តីរាយការណ៍របស់ប្រព័ន្ធផ្សព្វផ្សាយបានឲ្យដឹងថា ព្យុះព្រិលដែលមានរយៈពេលប្រហែល៣០នាទី បានកើតឡើងនៅក្នុងទីក្រុង Tarija ប្រទេសបូលីវី ជាទីក្រុងដែលមានកម្ពស់ជាង១.៨០០ម៉ែត្រលើនីវ៉ូទឹកសមុទ្រ នៅជិតព្រំដែនជាមួយប្រទេសអាហ្សង់ទីន។

ព្យុះព្រិលកាលពីថ្ងៃព្រហស្បតិ៍ បានកើតឡើងបន្ទាប់ពីសីតុណ្ហភាពបានឡើងដល់៣០អង្សាសេ នៅថ្ងៃមុនមានព្យុះព្រិល។ 

ប្រព័ន្ធផ្សព្វផ្សាយរបស់ប្រទេសបូលីវីបានរាយការណ៍ថា ព្យុះព្រិលចំនួនពីរលើកក៏បានកើតឡើងផងដែរកាលពីក្នុងខែកញ្ញា។