សារព័ត៌មានរដ្ឋចិន រាយការណ៍នៅថ្ងៃសុក្រនេះថា នាយករដ្ឋមន្រ្តីម៉ុងហ្គោលីលោក Gombojav Zandanshatar បានលាលែងពីតំណែង ក្រោយបាត់បត់ការគាំទ្រនៅសភាប្រទេសមួយនេះ ដែលជាការដកតួនាទីសំខាន់ ក្រោយកាន់តំណែងរយៈពេល ៤ខែប៉ុណ្ណោះ ។

យោងតាមសេចក្តីរាយការណ៍ពីទីភ្នាក់ងារព័ត៌មានរដ្ឋចិន Xinhua បានឲ្យដឹងថា នៅថ្ងៃសុក្រនេះ ក្រុមតំណាងរាស្រ្ត បានបោះឆ្នោតដកតំណែងលោក Zandanshatar ដែលជាអតីតរដ្ឋមន្រ្តីការបរទេស និងប្រធានសភា បន្ទាប់ពីជំនួប ។

លោក Zandanshatar វ័យ ៥៥ឆ្នាំ ត្រូវបានតែងតាំងជានាយករដ្ឋមន្រ្តីទី ៣២របស់ម៉ុងហ្គោលី កាលពីខែមិថុនាកន្លងទៅ បន្ទាប់អ្នកឡើងកាន់តំណែងមុនរបស់លោក គឺលោក Luvsannamsrai Oyun-Erdene បានលាលែងពីតំណែងផងដែរ ក្រោយបាត់បង់ការគាំទ្រនៅសភា ដោយសារអំណះអំណាងពុករលួយ និងបាតុកម្មតាមដងផ្លូវ ។

លោក Ukhnaa Khurelsukh ដែលជាប្រមុខរដ្ឋ និងជាប្រធានាធិបតីម៉ុងហ្គោលី ចាប់តាំងពីឆ្នាំ ២០២១រហូតមកនោះ ត្រូវបានគេរំពឹងថា នឹងតែងតែងនាយករដ្ឋមន្រ្តីបន្ទាប់ដែលតម្រូវឲ្យមានការឯកភាពពីសភាផងដែរ ។

គួរឲ្យដឹងថា របត់នយោបាយម៉ុងហ្គោលី ត្រូវបានរង្គោះរង្គើរដោយសាររលកនៃភាពឆាប់ប្រែប្រួលក្នុងរយៈពេលប៉ុន្មានឆ្នាំចុងក្រោយនេះ ស្របពេលមានការខឹងសម្បាររបស់សាធារណជនចំពោះអំពើពុករលួយ និងសេដ្ឋកិច្ចក្នុងស្រុកទន់ខ្សោយ ។

ការបណ្តេញនាយករដ្ឋមន្រ្តី ២រូប ក្នុងរយៈពេលត្រឹមតែប៉ុន្មានខែនេះដែរ នឹងធ្វើឲ្យមានភាពពុំច្បាស់លាស់ ចំពោះនិរន្តរភាពនយោបាយ និងបំផ្លាញស្មារតីវិនិយោគសម្រាប់ប្រទេសសម្បូរធនធានមួយនេះ ៕