រដ្ឋាភិបាលប៉េរូនិយាយថា ពួកគេនឹងប្រកាសដាក់រដ្ឋក្នុងគ្រាអាសន្ននៅរដ្ឋធានី Lima បន្ទាប់ពីបាតុកម្មក្នុងរដ្ឋធានីប្រទេសប៉េរូមួយនេះ បណ្តាលឲ្យមនុស្សម្នាក់ស្លាប់ និងមន្រ្តីនគរបាលរាប់សិបនាក់រងរបួស ។

កាលពីយប់ថ្ងៃពុធកន្លងទៅ ក្រុមបាតុករបានប៉ះទង្គិចគ្នាជាមួយនគរបាលដែលបានបាញ់ឧស្ម័នបង្ហូរទឹកភ្នែក ខណៈក្រុមបាតុករនាំគ្នាចោលកាំជ្រួចផ្កាភ្ញី និងដុំថ្មនៅក្រៅសភា ស្ថិតក្នុងទីក្រុង Lima ។

វាគឺជាបាតុកម្មចុងក្រោយគេនៅក្នុងចំណោមបាតុកម្មជាបន្តបន្ទាប់ប្រឆាំងលោកប្រធានាធិបតី Jose Jeri ដែលបានឡើងកាន់អំណាចកាលពីរយៈពេលប៉ុន្មានថ្ងៃមុន ។

បាតុកម្មនេះ ត្រូវបានរៀបចំឡើងដោយក្រុមបាតុករ Gen Z ក្រុមកម្មករដឹកជញ្ជូន និងក្រុមស៊ីវិល ដែលប្រឆាំងនឹងអំពើពុករលួយ និងឧក្រិដ្ឋកម្មកើនឡើង ។

បាតុករមួយរូបនិយាយថា ពួកគេពុំសមកាន់អំណាចនោះទេ ពួកគេពុំស្របច្បាប់នោះទេ ពួកយើងទាមទារឲ្យមានដំណោះស្រាយចំពោះបញ្ហាឧក្រិដ្ឋកម្ម ពួកគេសម្លាប់ពួកយើងរាល់ថ្ងៃ តើក្រុមនគរបាលកំពុងធ្វើអ្វី? ។

ថ្លែងទៅកាន់សភាកាលពីថ្ងៃព្រហស្បតិ៍ លោក Jeri បានដាក់ការស្តីបន្ទោសអំពើហិង្សានេះលើក្រុមមិនច្បាស់លាស់ ព្យាយាមជំរុញរបៀបវារៈបង្កទៅជាភាពវឹកវរ ។

នៅមុននេះលោក Jeri បាននិយាយលើបណ្តាញព័ត៌មានសង្គមថា នឹងមានការស៊ើបអង្កេតជុំវិញករណីស្លាប់បាតុករម្នាក់ ។

សូមបញ្ជាក់ថា តំណែងប្រធានាធិបតីរបស់លោក Jeriនឹងត្រូវបញ្ចប់នៅខែកក្កដា ឆ្នាំក្រោយ ដោយសារការបោះឆ្នោតតាមការគ្រោងទុក ៕