បទឈប់បាញ់ នៅតំបន់ហ្កាហ្សា កំពុងធ្វើឲ្យមានក្តីសង្ឃឹមកាន់តែខ្ពស់ឡើងៗ ក្នុងចំណោមមនុស្សជាច្រើន នៅអ៊ីស្រាអែល ដែលថា ប្រទេសនេះអាចចាប់ផ្តើមកែលម្អមុខមាត់របស់ខ្លួននៅលើឆាកអន្តរជាតិឡើងវិញ បន្ទាប់ពីជួបប្រទះនឹងស្ថានភាពឯកោកាន់តែខ្លាំងទៅៗ ដោយសារតែផលប៉ះពាល់អវិជ្ជមានពីជម្លោះរយៈពេល ២ឆ្នាំ។

ការយល់ឃើញជាសាធារណៈ នៅប្រទេសលោកខាងលិច បានផ្លាស់ប្តូរយ៉ាងខ្លាំង ចាប់តាំងពីសង្រ្គាម បានផ្ទុះឡើងបន្ទាប់ពីមានការវាយប្រហាររបស់ក្រុមហាម៉ាសកាលពីថ្ងៃទី៧ ខែតុលា ឆ្នាំ២០២៣ លើអ៊ីស្រាអែល ដែលពេលនោះមនុស្សប្រហែល ១.២០០នាក់ ត្រូវបានសម្លាប់ ហើយ ២៥១នាក់ ត្រូវបានចាប់ធ្វើជាចំណាប់ថ្នូរ។

ការតវ៉ាបានកើនឡើងជាលំដាប់ ជុំវិញការប៉ះពាល់ផ្នែកមនុស្សធម៌ ដោយសារការវាយលុករបស់អ៊ីស្រាអែល ហើយប្រទេសលោកខាងលិចមួយចំនួន បានទទួលស្គាល់រដ្ឋប៉ាឡេស្ទីនជាសាធារណៈ ក្នុងប៉ុន្មានខែថ្មីៗនេះ ទោះបីជាមានការប្រឆាំងយ៉ាងខ្លាំងពីរដ្ឋាភិបាលរបស់នាយករដ្ឋមន្ត្រីអ៊ីស្រាអែល លោក Benjamin Netanyahu និងទីក្រុងវ៉ាស៊ីនតោនក៏ដោយ។

ការស្ទង់មតិបរទេស បានបង្ហាញពីការថយចុះនូវការគាំទ្រ ចំពោះយុទ្ធនាការយោធារបស់អ៊ីស្រាអែល សូម្បីតែពីសម្ព័ន្ធមិត្តដ៏សំខាន់បំផុតរបស់ខ្លួន គឺសហរដ្ឋអាមេរិក។ បើយោងតាមមន្ត្រីសុខាភិបាលរបស់តំបន់ហ្កាហ្សា បានឲ្យដឹងថា ប្រជាជនប៉ាឡេស្ទីនជាង ៦៧.០០០នាក់ ត្រូវបានសម្លាប់នៅក្នុងដែនដីនេះ។ សារព័ត៌មានរ៉យទ័រ បានជួបជាមួយមន្ត្រី និងអ្នកជំនាញអ៊ីស្រាអែល ទាំងបច្ចុប្បន្ន និងអតីតចំនួន ១៣នាក់ ដែលបានទទួលស្គាល់ថា ផលប៉ះពាល់អវិជ្ជមានផ្នែកមនុស្សធម៌ពីជម្លោះនេះ បានធ្វើឲ្យកេរ្តិ៍ឈ្មោះអ៊ីស្រាអែលខូចខាតយ៉ាងធ្ងន់ធ្ងរ។

យ៉ាងណាក្ដី មនុស្សជាច្រើនបានបង្ហាញពីការមានក្តីសង្ឃឹមថា ការដោះលែងចំណាប់ថ្នូរអ៊ីស្រាអែល និងអ្នកទោស និងអ្នកជាប់ឃុំប៉ាឡេស្ទីនដែលជាផ្នែកនៃដំណាក់កាលដំបូងនៃកិច្ចព្រមព្រៀងហ្កាហ្សា នៅសប្តាហ៍នេះ អាចជួយឲ្យចាប់ផ្តើមដំណើរការស្តារកេរ្តិ៍ឈ្មោះរបស់អ៊ីស្រាអែលឡើងវិញបានហើយ៕