ប្រធានាធិបតីអាមេរិក លោក Donald Trump នឹងពិភាក្សាអំពីលទ្ធភាពផ្គត់ផ្គង់មីស៊ីល Tomahawk ដល់អ៊ុយក្រែន ជាមួយលោកប្រធានាធិបតី Volodymyr Zelenskiy នៅថ្ងៃសុក្រ (ទី១៧ ខែតុលា) នេះ ប៉ុន្តែការប្រកាសដ៏គួរឲ្យភ្ញាក់ផ្អើលពីកិច្ចប្រជុំកំពូលថ្មី រវាងសហរដ្ឋអាមេរិក និងរុស្ស៊ី បានធ្វើឲ្យការរំពឹងទុកនេះស្ថិតក្នុងភាពមិនច្បាស់លាស់។

កាលពីថ្ងៃព្រហស្បតិ៍ លោក Trump បាននិយាយថា លោកអាចនឹងជួបជាមួយប្រធានាធិបតីរុស្ស៊ី លោក Vladimir Putin ក្នុងរយៈពេល ២សប្តាហ៍ខាងមុខ នៅទីក្រុង Budapest ប្រទេសហុងគ្រី បន្ទាប់ពីមានកិច្ចសន្ទនាតាមទូរសព្ទជាង ២ម៉ោង អំពីសង្គ្រាមរបស់រុស្ស៊ី នៅអ៊ុយក្រែន ដែលលោកបានបញ្ជាក់ថា ប្រកបដោយផ្លែផ្កា។

ហើយក្រោយមក លោក Trump បានប្រាប់អ្នកសារព័ត៌មាននៅឯសេតវិមានថា៖ «ពេញមួយជីវិតរបស់ខ្ញុំ ខ្ញុំបានធ្វើកិច្ចព្រមព្រៀងជាច្រើន។ ខ្ញុំគិតថា យើងនឹងសម្រេចបានកិច្ចព្រមព្រៀងមួយនេះ ហើយសង្ឃឹមថា ឆាប់ៗនេះ»។ តាមរយៈការបង្ហោះ នៅលើបណ្ដាញសង្គម Truth Social លោក Trump បានឲ្យដឹងថា លោកនឹងប្រាប់លោក Zelenskiy អំពីកិច្ចពិភាក្សាជាមួយរុស្ស៊ី នៅឯការិយាល័យ Oval នាថ្ងៃសុក្រនេះ។

យ៉ាងណាក្ដី សំឡេងបង្ហាញពីការស្រុះស្រួលរបស់លោក Trump បន្ទាប់ពីមានការជជែកតាមទូរសព្ទជាមួយលោក Putin បាននាំឲ្យមានមន្ទិលសង្ស័យខ្លាំងឡើងៗ អំពីលទ្ធភាពនៃការផ្តល់ជំនួយដល់អ៊ុយក្រែន ក្នុងរយៈពេលដ៏ខ្លី ហើយបានធ្វើឲ្យអឺរ៉ុបមានក្ដីបារម្ភថា សហរដ្ឋអាមេរិកព្រមចុះញ៉មតាមការទាមទាររបស់ទីក្រុងមូស្គូ៕