កម្មវិធីស្បៀងអាហារពិភពលោក(WFP)របស់អង្គការសហប្រជាជាតិ(UN)និយាយនៅថ្ងៃសុក្រនេះ ពួកគេនាំស្បៀងអាហារទម្ងន់ជាមធ្យមប្រហែល ៥៦០តោន ក្នុង ១ថ្ងៃ ចូលទៅកាន់តំបន់ហ្កាហ្សា ចាប់តាំងពីបទឈប់បាញ់រវាងអ៊ីស្រាអែល និងក្រុមហាម៉ាស បានចូលជាធរមាន ប៉ុន្តែស្បៀងអាហារបន្ថែមទៀត ត្រូវការសម្រាប់ដែនដីមួយនេះ ។

លោក Abeer Etefa គឺជាអ្នកនាំពាក្យរបស់ WFP និយាយប្រាប់ក្រុមអ្នកសារព័ត៌មាននៅទីក្រុងហ្សឺណែវ ប្រទេសស្វីសថា ពួកយើងស្ថិតក្នុងកម្រិតទាបជាងអ្វីដែលពួកយើងត្រូវការ ប៉ុន្តែពួកយើងកំពុងនាំយកស្បៀងអាហារទៅកាន់ទីនោះ ។ បទឈប់បាញ់បានបើកបង្អួចតូចនៃឱកាស ហើយ WFP កំពុងពន្លឿន ដើម្បីបង្កើនជំនួយស្បៀងអាហារចូលទៅកាន់តំបន់មួយនេះ ។

WFP និយាយថា ពួកគេពុំទាន់ចាប់ផ្តើមចែកចាយជំនួយទៅកាន់ទីក្រុងហ្កាហ្សានោះទេ ដោយសារច្រកបន្តបិទត្រង់ចំណុច Zikim និងចំណុច Erez ក្នុងនោះអ៊ីស្រាអែលនៅភាគខាងជើងដែនដីមួយនេះ ជាទីដែលវិបត្តិមនុស្សធម៌ធ្ងន់ធ្ងរបំផុត ។

លោក Etefa និយាយថា ការចូលទៅកាន់ទីក្រុងហ្កាហ្សា និងតំបន់ភាគខាងជើងហ្កាហ្សា គឺជាការងារដ៏លំបាកបំផុត ។ ក្បួនរថយន្តដឹកម៉្សៅស្រូវសាលី ពិបាកធ្វើដំណើរតាមបណ្តោយផ្លូវរងការខូចខាតនិងបិទ ចេញពីភាគខាងត្បូងដែនដីខ្ទេចខ្ទាំងដោយសារភ្លើងសង្រ្គាមមួយនេះ ៕