ក្រចេះ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងជាប្រធានអាស៊ាន ឆ្នាំ២០២២ បានរំលឹកជាថ្មីថា ប្រសិនបើ មិនជ្រើសយកផ្លូវចរចាទេ គឺមិនអាចបញ្ចប់បញ្ហាមីយ៉ានម៉ាបាននោះទេ ដោយសម្ដេច បានផ្ដល់បទពិសោធន៍ថា វិធីសាស្ត្ររបស់សម្តេច គឺពន្លត់ភ្លើងសង្គ្រាមជាមុនសិន ទើបដំណើរការប្រជាធិបតេយ្យ និងអ្វីៗទៅតាមក្រោយបាន។

សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា និងជាប្រធានអាស៊ាន ឆ្នាំ២០២២ ខណៈអញ្ជើញ​ជាអធិបតីដ៏​ខ្ពង់ខ្ពស់​នៅក្នុង​ពិធី​សម្ពោធ​បើកឱ្យ​ប្រើប្រាស់​ជាផ្លូវការកំណាត់​ផ្លូវជាតិ​លេខ៧ នៅខេត្តក្រចេះ នៅព្រឹកថ្ងៃទី៧ ខែកុម្ភៈ នេះ​ បានលើកឡើងជាថ្មីម្ដងទៀត អំពី​បញ្ហា​មីយ៉ាន់ម៉ា និងបានរំលឹកដល់អ្នកដែលរិះគន់សម្ដេចថា​ ការដែលសម្តេចទៅ​ មីយ៉ាន់ម៉ាថា សម្តេច​គ្មាន​ផល​ប្រយោជន៍អ្វីក្រៅ​តែ​ពី​ចង់​ជួយ​មីយ៉ាន់ម៉ា​ ឱ្យចេញផុតពីសង្គ្រាមនោះទេ។ ​អ្នកពេញចិត្ត ក៏ ពេញចិត្ត ​អ្នកមិនពេញចិត្ត ​ក៏មិនពេញចិត្ត ​គឺអាស្រ័យទៅលើគេ។ តែបើមិន​ជ្រើស​យក​មធ្យោបាយចរចាទេ​ កុំសង្ឃឹមថា​ នឹងអាចដោះស្រាយបញ្ហាបានឱ្យសោះ។

សម្តេចតេជោ ​បានរំលឹកដល់ប្រជាជន ​ឬពួកប្រឆាំងនៅមីយ៉ាន់ម៉ា​ ឬអ្នកណាដទៃទៀតនោះទេ គឺនឹងឃើញការប្រយុទ្ធគ្នាអត់ឈប់ ប្រសិនបើប្រកាន់យកបន្តតាមរបៀបបិទទ្វារ ហើយជួយដោះស្រាយបញ្ហាមីយ៉ាន់ម៉ា របស់សម្តេច គឺមិនមែនទៅ១ថ្ងៃ ដោះស្រាយបានទេ ខណៈមីយ៉ាន់ម៉ា​ សាំញ៉ាំ​ដោយ​បញ្ហា​យោធារាប់ឆ្នាំមក​ហើយនោះ៕ អត្ថបទ៖ មុត សុទ្ធ