ជនប៉ាឡេស្ទីននៅតំបន់ហ្កាហ្សាបន្តរងគ្រោះក្នុងការទទួលបានស្បៀងអាហារ ទឹក និងគ្រឿងផ្គត់ផ្គង់វេជ្ជសាស្រ្តចំាបាច់ រយៈពេល ១សប្តាហ៍នៃកិច្ចព្រមព្រៀងឈប់បាញ់ ស្របពេលដែលអ៊ីស្រាអែលរឹតត្បិតខ្លាំងលើលំហូរចូលជំនួយទៅកាន់ដែនដីខ្ទេចខ្ទាំដោយសារសង្រ្គាមមួយនេះ ។

អ្នកស្រី Tess Ingram គឺជាអ្នកនាំពាក្យមូលនិធិកុមារអន្តរជាតិអង្គការសហប្រជាជាតិ(UNICEF)និយាយថា ជនប៉ាឡេស្ទីននៅភាគខាងជើងហ្កាហ្សា ត្រូវការស្បៀងអាហារ និងទឹកស្អាតខ្លាំងបំផុត ស្របពេលដែលមនុស្សរាប់ម៉ឺននាក់ បានវិលត្រឡប់ទៅកាន់ផ្ទះសម្បែងរងការបំផ្លិចបំផ្លាញរបស់ពួកគេវិញ ។

ថ្លែងប្រាប់កាសែត Al Jazeera ពីតំបន់ al-Mawasi ស្ថិតនៅភាគខាងត្បូងតំបន់ហ្កាហ្សាស្រ្ទីប អ្នកស្រី Ingram និយាយថា ដើម្បីបង្កើនការចែកចាយជំនួយមនុស្សធម៌ ច្រកឆ្លងកាត់ទំាងអស់ចូលទៅក្នុងដែនដីមួយនេះ ត្រូវតែបើកឡើងវិញ ។

អ្នកស្រីនិយាយថា ទុក្ខលំបាកពិតជាមានច្រើនខ្លាំងណាស់ ។ មាននូវកុមារ ២៨.០០០នាក់ ដែលត្រូវបានធ្វើរោគវិនិច្ឆ័យឃើញមានកង្វះអាហារូបត្ថម្ភធ្ងន់ធ្ងរនៅខែកក្កដា និងខែសីហា ហើយមានកុមាររាប់ម៉ឺននាក់ទៀត រកឃើញចាប់តាំងពីពេលនោះមក ដូច្នេះហើយ ពួកយើងត្រូវប្រាកដថា វាមិនត្រឹមតែជាស្បៀងអាហារប៉ុណ្ណោះនោះទេ ប៉ុន្តែវាជាថ្នាំព្យាបាលកង្វះអាហារូបត្ថម្ភផងដែរ ។

ខណៈពេលនោះដែរ ការិយាល័យប្រព័ន្ធផ្សព្វផ្សាយគ្រប់គ្រងដោយក្រុមហាម៉ាស បានជំរុញសហគមន៍អន្តរជាតិឲ្យបំពេញកាតព្វកិច្ចផ្លូវច្បាប់ និងមនុស្សធម៌របស់ខ្លួន ដោយដាក់សម្ពាធលើអ៊ីស្រាអែលឲ្យបើកច្រកឆ្លងកាត់ឡើងវិញជាបន្ទាន់ និងអនុញ្ញាតឲ្យចាប់ផ្តើមបោសសម្អាតកម្ទេចកម្ទី និងគំនរបាក់បែក ។

យោងតាមតួលេខចេញផ្សាយដោយអាជ្ញាធរសុខាភិបាលហ្កាហ្សាកាលពីថ្ងៃព្រហស្បតិ៍ម្សិលមិញ បានឲ្យដឹងថា ចាប់តាំងពីសង្គ្រាមហ្កាហ្សាផ្ទុះឡើងកាលពីថ្ងៃទី ៧ ខែតុលា ឆ្នាំ ២០២៣ ការវាយប្រហារតាមអាកាស និងថ្មើរជើង របស់អ៊ីស្រាអែលបានបំផ្លិចបំផ្លាញតំបន់រងការហ៊ុមព័ទ្ធនេះ បណ្តាលឲ្យមានគ្រោះទុរ្ភិក្ស និងការផ្លាស់ទីលំនៅ និងបានសម្លាប់មនុស្សយ៉ាងហោច ៦៧.៩៦៧ នាក់ និងមនុស្ស ១៧០.១៧៩ នាក់ផ្សេងទៀត រងរបួស ៕