ប្រទេសប៉ាគីស្ថាន និងអាហ្វហ្គានីស្ថាន បានព្រមព្រៀងគ្នាកាលពីថ្ងៃសុក្រ ទី១៧ ខែតុលា ដើម្បីបន្ថែមពេលបទឈប់បាញ់រយៈពេល ៤៨ ម៉ោង រហូតដល់ការបញ្ចប់កិច្ចចរចានាពេលខាងមុខនៅក្នុងទីក្រុងដូហា ប្រទេសកាតា នេះបើយោងតាមមន្ត្រីប៉ាគីស្ថាន និងអាហ្វហ្គានីស្ថាន។

ប្រភពព័ត៌មានបានប្រាប់សារព័ត៌មានរ៉យទ័រថា គណៈប្រតិភូប៉ាគីស្ថាន បានទៅដល់ទីក្រុងដូហារួចហើយ ខណៈគណៈប្រតិភូអាហ្វហ្គានីស្ថានត្រូវបានរំពឹងទុកនៅថ្ងៃសៅរ៍នេះ។ កិច្ចពិភាក្សា មានគោលបំណងធ្វើឲ្យមានស្ថិរភាពចំពោះភាពតានតឹងបន្ទាប់ពីមានការប៉ះទង្គិចគ្នានៅតាមព្រំដែនជាច្រើនថ្ងៃ។

ពាក្យនៃការបន្ថែមពេលបទឈប់បាញ់បានកើតឡើងប៉ុន្មានម៉ោងបន្ទាប់ពីការវាយប្រហារអត្តឃាតនៅជិតព្រំដែនប្រទេសអាហ្វហ្គានីស្ថានដែលបានសម្លាប់ទាហានប៉ាគីស្ថាន៧នាក់និងរងរបួស១៣នាក់ ដែលបង្ហាញពីភាពផុយស្រួយចំពោះស្ថានភាព។

មន្ត្រីប៉ាគីស្ថានបាននិយាយថា ក្រុមសកម្មប្រយុទ្ធបានកំណត់គោលដៅលើជំរំយោធាមួយកន្លែងនៅ តំបន់ North Waziristan ដោយបានបើករថយន្តផ្ទុកគ្រឿងផ្ទុះចូលទៅដល់ជញ្ជាំងបរិវេណជំរំយោធា មុនពេលខ្មាន់កាំភ្លើងពីរនាក់ប៉ុនប៉ងសម្រុកចូលមូលដ្ឋាន។ យោងតាមការិយាល័យរបស់នាយករដ្ឋមន្ត្រី លោក Shehbaz Sharif បានឱ្យដឹងថា អ្នកវាយប្រហារចំនួន៦នាក់ត្រូវបានសម្លាប់។

នៅថ្ងៃបន្ទាប់ អ្នកនាំពាក្យក្រុមតាលីបង់ លោក Zabihullah Mujahid បានប្រាប់ប្រព័ន្ធផ្សព្វផ្សាយអាហ្វហ្គានីស្ថានថា ទីក្រុងកាប៊ុល បានបញ្ជាកងកម្លាំងរបស់ខ្លួនឱ្យរក្សាបទឈប់បាញ់ ដរាបណាប្រទេសប៉ាគីស្ថាន មិនវាយប្រហារបន្ថែមទៀត។