ខណៈពិភពលោកប្រារព្ធទិវាអន្តរជាតិសម្រាប់ការលុបបំបាត់ភាពក្រីក្រកាលពីថ្ងៃសុក្រ ជាថ្ងៃដែលមានបំណងលើកកម្ពស់ការយល់ដឹង និងជំរុញសកម្មភាពប្រឆាំងនឹងភាពក្រីក្រ ប្រជាជននៅតំបន់ហ្កាហ្សាស្ទ្រីបបានមើលឃើញថាពួកគេជាប់នៅក្នុងគ្រោះមហន្តរាយមនុស្សធម៌ដែលបន្តកើតមានដោយមិនដឹងថាពេលណាទើបចប់។ 

សង្គ្រាមរយៈពេលពីរឆ្នាំបង្កដោយអ៊ីស្រាអែលបានធ្វើឱ្យអត្រាភាពក្រីក្រ និងអត្រាគ្មានការងារធ្វើកើនឡើងនៅក្នុងដែនដីហ្កាហ្សា ដោយបានបំផ្លិចបំផ្លាញជីវភាពរស់នៅ និងធ្វើឱ្យប្រជាជនធ្លាក់ចូលក្នុងទីដ៏ជ្រៅនៃភាពអស់សង្ឃឹម។ ជាមួយនឹងការផ្អាកការងារ និងឱកាសការងារស្ទើរតែមិនមាន អ្នកស្រុកនៅតំបន់ហ្កាហ្សាកំពុងអំពាវនាវឱ្យពួកគេទទួលបានជីវិតថ្លៃថ្នូរ ដោយសង្ឃឹមថាគោលដៅអន្តរជាតិដើម្បីលុបបំបាត់ភាពក្រីក្រ អាចក្លាយជាការពិតនៅលើមូលដ្ឋានក្នុងតំបន់ហ្កាហ្សា មិនមែនគ្រាន់តែជាការអំពាវនាវដ៏ទន់ខ្សោយនោះទេ។

ទំហំនៃការបំផ្លិចបំផ្លាញនៅហ្កាហ្សាគឺមានវិសាលភាពធំធេងណាស់។ យោងតាមស្ថិតិបឋមពីទីភ្នាក់ងារអង្គការសហប្រជាជាតិ និងក្រុមអ្នកជំនាញសេដ្ឋកិច្ច សង្រ្គាមបានបំផ្លាញហេដ្ឋារចនាសម្ព័ន្ធជាង ៨៥ ភាគរយនៃតំបន់ហ្កាហ្សា ជាមួយនឹងលំនៅដ្ឋានប្រមាណ ៤០០.០០០ ខ្នង ត្រូវបានបំផ្លាញទាំងស្រុង ឬដោយផ្នែក ហើយប្រព័ន្ធទឹក អគ្គិសនី និងប្រព័ន្ធទំនាក់ទំនងស្ទើរតែបាត់បង់ទាំងស្រុង៕