លោកប្រធានាធិបតី Volodymyr Zelenskyy ទំនងជាបានចាកចេញដោយដៃទទេពីកិច្ចប្រជុំនៅសេតវិមាន បន្ទាប់ពីប្រធានាធិបតីអាមេរិក Donald Trump បានបង្ហាញថាលោកពុំទាន់បានត្រៀមខ្លួន ក្នុងការផ្គត់ផ្គង់មីស៊ីលតម្រង់គោលដៅTomahawk ដែលអ៊ុយក្រែនកំពុងស្វែងរកនោះទេ។

លោក Zelenskyy បាននិយាយបន្ទាប់ពីជំនួបទ្វេភាគីប្រកបដោយភាពស្និទ្ធស្នាលថា លោក និងលោក Trump បាននិយាយអំពីមីស៊ីលរយៈចម្ងាយឆ្ងាយ ប៉ុន្តែបានសម្រេចចិត្តមិនធ្វើសេចក្តីថ្លែងការណ៍លើបញ្ហានេះ ដោយសារតែសហរដ្ឋអាមេរិកមិនចង់ឱ្យមានជម្លោះកើនឡើង ។

បន្ទាប់ពីកិច្ចប្រជុំនោះ លោក Trump បានសរសេរលើប្រព័ន្ធផ្សព្វផ្សាយសង្គម អំពាវនាវឱ្យទីក្រុង Kyiv និងទីក្រុងមូស្គូបញ្ចប់សង្រ្គាម។

ជំនួបរវាង លោក Trumpនិងលោក Zelenskyy បានកើតឡើងមួយថ្ងៃបន្ទាប់ពីលោក Trump បានសន្ទនាជាមួយប្រធានាធិបតីរុស្ស៊ីលោក Vladimir Putin តាមទូរស័ព្ទ ហើយបានយល់ព្រមជួបគ្នានៅប្រទេសហុងគ្រីក្នុងពេលឆាប់ៗនេះ។

លោក Trump បាននិយាយថា ការបញ្ជូនមីស៊ីលនេះ នឹងក្លាយជាការដុតបញ្ឆេះជម្លោះឲ្យកាន់តែរីកធំ ប៉ុន្តែពួកលោក នឹងនិយាយអំពីបញ្ហានេះ៕