ហ្វូងមនុស្សយ៉ាងច្រើន បានជួបជុំគ្នាដើម្បីតវ៉ាប្រឆាំងគោលនយោបាយរបស់លោកប្រធានាធិបតី Donald Trump នៅតាមទីក្រុងជាច្រើនទូទាំងសហរដ្ឋអាមេរិក ក្នុងនោះរួមទាំងទីក្រុង New York, Washington DC, Chicago, Miami និងទីក្រុង Los Angeles ។

ការដង្ហែរក្បួននៅទីលានចតុរង្គនិមិត្តរូប Times Square របស់ទីក្រុង New York បានទាក់ទាញមនុស្សរាប់ម៉ឺននាក់ មិនយូរប៉ុន្មានក្រោយវាចាប់ផ្តើមកាលពីព្រឹកថ្ងៃសៅរ៍ ។

ដងផ្លូវ និងច្រកចូលរថភ្លើងក្រោមដីកកកុញដោយហ្វូងមនុស្សដែលនាំគ្នាកាន់បដាមានសរសេរពាក្យស្លោក “លទ្ធិប្រជាធិបតេយ្យ មិនមែនរបបរាជានិយមនោះទេ” និងពាក្យស្លោក “រដ្ឋធម្មនុញ្ញមិនមែនស្រេចតាមអំពើចិត្តនោះទេ” ។

មុនបាតុកម្មកើតឡើង សម្ព័ន្ធមិត្តរបស់លោក Trumpបានចោទប្រកាន់បាតុកម្មនេះថា មានការជាប់ពាក់ព័ន្ធជាមួយក្រុមចលនាឆ្វេងនិយម Antifa និងថ្កោលទោសអ្វីដែលពួកគេចាត់ទុកថាជា “ការប្រមូលផ្តុំធ្វើបាតុកម្មអាមេរិកដ៏គួរឲ្យស្អប់ខ្ពើម” ។

ក្រុមអ្នករៀបចំ និងក្រុមបាតុករដែលបានចេញតវ៉ាកាលពីថ្ងៃសៅរ៍និយាយថា ការជួបជុំគ្នានេះ ធ្វើឡើងដោយស្ងៀមស្ងាត់ ។

ក្រុមអ្នករៀបចំបាតុកម្មបញ្ជាក់នៅលើគេហទំព័ររបស់ពួកគេថា គ្មានអំពើហិង្សាគឺជាគោលការស្នូលនៃបាតុកម្ម “No Kings” ។

គួរឲ្យដឹងថា ចាប់តាំងពីការវិលត្រឡប់ទៅកាន់សេតវិមានវិញកាលពីខែមករា លោក Trump បានពង្រីកវិសាលភាពអំណាចប្រធានាធិបតី ដោយប្រើប្រាស់បទបញ្ជាប្រតិបត្តិ ដើម្បីរុះរើផ្នែកខ្លះនៃរដ្ឋាភិបាលសហព័ន្ធ និងដាក់ពង្រាយកងកម្លាំងឆ្មាំជាតិទៅកាន់ទីក្រុងនានារបស់សហរដ្ឋអាមេរិក បើទោះបីជាមានការជំទាស់ពីអភិបាលរដ្ឋក៏ដោយ ៕