ក្រោយជំនួបជាមួយប្រធានាធិបតីអ៊ុយក្រែនលោក Volodymyr Zelenskiy នៅសេតវិមានកាលពីថ្ងៃសុក្រ ប្រធានាធិបតីសហរដ្ឋអាមេរិកលោក Donald Trump និយាយថា សាររបស់គាត់សម្រាប់គាត់ និងប្រធានាធិបតីរុស្ស៊ីលោក Putin គឺ “ត្រូវបញ្ឈប់សមរភូមិប្រយុទ្ធឥឡូវនេះភ្លាម” ។

ពេលធ្វើដំណើរទៅដល់រដ្ឋ Florida លោក Trump និយាយប្រាប់ក្រុមអ្នកសារព័ត៌មានថា សង្រ្គាមគួរតែបញ្ឈប់ ហើយភាគីទាំង ២ គួរតែដើរតាមខ្សែបន្ទាត់សមរភូមិគ្រប់ទីកន្លែង ។ បើមិនដូច្នោះទេ វាកាន់តែស្មុគស្មាញខ្លាំង ។ អ្នកនឹងមិនអាចដោះស្រាយបញ្ហាបាននោះទេ ។

ស្របពេលដែលលោក Trump ពុំបានច្រានចោលការផ្តល់មីស៊ីលរយៈចម្ងាយឆ្ងាយ Tomahawk ដែលលោក Zelenskiy ស្វែងរក លោកហាក់ត្រជាក់ចិត្តចំពោះអនាគត ពេលដែលលោកគ្រោងនឹងជួបប្រធានាធិបតីរុស្ស៊ីលោក Vladimir Putin ក្នុងរយៈពេលប៉ុន្មានសប្តាហ៍ទៀតនេះ ។

ក្រោយជួបលោក Zelenskiy អស់រយៈពេលជាង ២ម៉ោង លោក Trump បានអំពាវនាវដល់ភាគីទាំង ២នៅលើបណ្តាញព័ត៌មានសង្គមឲ្យបញ្ឈប់ការកាប់សម្លាប់គ្នា និងបង្កើតកិច្ចព្រមព្រៀង ។

ដោយឡែក លោក Zelenskyy បាននិយាយបន្ទាប់ពីជំនួបទ្វេភាគីប្រកបដោយភាពស្និទ្ធស្នាលនេះថា លោក និងលោក Trump បាននិយាយអំពីមីស៊ីលរយៈចម្ងាយឆ្ងាយ ប៉ុន្តែបានសម្រេចចិត្តមិនធ្វើសេចក្តីថ្លែងការណ៍លើបញ្ហានេះ ដោយសារតែសហរដ្ឋអាមេរិកមិនចង់ឲ្យមានជម្លោះកើនឡើង ។

ជំនួបនេះដែរ បានកើតឡើងមួយថ្ងៃបន្ទាប់ពីលោក Trump បានសន្ទនាជាមួយលោក Putin តាមទូរស័ព្ទ ហើយបានយល់ព្រមជួបគ្នានៅប្រទេសហុងគ្រីក្នុងពេលឆាប់ៗនេះ ៕