នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃសៅរ៍ (១៨ តុលា) ថា ច្រកព្រំដែន Rafah រវាងដែនដីហ្កាហ្សា និងប្រទេសអេហ្ស៊ីប នឹងនៅតែបន្តបិទរហូតដល់មានការជូនដំណឹងបន្ថែម ហើយថា ការបើកឡើងវិញរបស់ច្រកដឹកជំនួយនេះនឹងពឹងផ្អែកលើក្រុមហាម៉ាសប្រគល់សាកសពចំណាប់ថ្នូរដែលបានស្លាប់ ខណៈភាគីទាំងពីរនៅតែបន្តស្តីបន្ទោសដាក់គ្នាទៅមកលើការរំលោភបំពានបទឈប់បាញ់។

សេចក្តីថ្លែងការណ៍របស់លោក Netanyahu បានកើតឡើងភ្លាមៗបន្ទាប់ពីស្ថានទូតប៉ាឡេស្ទីនប្រចាំនៅអេហ្ស៊ីប បានប្រកាសថា ច្រកផ្លូវ Rafah ដែលជាច្រកសំខាន់សម្រាប់ពលរដ្ឋហ្កាហ្សាចាកចេញ និងចូលទៅក្នុងតំបន់នោះ នឹងបើកឡើងវិញនៅថ្ងៃចន្ទ ស្អែកនេះ សម្រាប់ការចូលទៅកាន់តំបន់ហ្កាហ្សា។

រដ្ឋាភិបាលរបស់លោក Netanyahu និងក្រុមហាម៉ាស បានបន្ទោសគ្នាអស់ជាច្រើនថ្ងៃមកហើយចំពោះការបំពានបទឈប់បាញ់ដែលសម្របសម្រួលដោយសហរដ្ឋអាមេរិក។ កាលពីល្ងាចថ្ងៃសៅរ៍នៅទីក្រុងវ៉ាស៊ីនតោន ក្រសួងការបរទេសអាមេរិកនិយាយថា ខ្លួនមាន "របាយការណ៍គួរឱ្យទុកចិត្ត ដែលចង្អុលបង្ហាញពីការរំលោភបទឈប់បាញ់ជិតមកដល់ដោយក្រុមហាម៉ាស ប្រឆាំងនឹងប្រជាជនហ្កាហ្សា"។

ក្រសួងការបរទេសអាមេរិកព្រមានថា ការវាយប្រហារដែលបានគ្រោងទុកប្រឆាំងនឹងជនស៊ីវិលប៉ាឡេស្ទីននោះ នឹងក្លាយជា "ការបំពានដោយផ្ទាល់ និងធ្ងន់ធ្ងរបំផុតនៃកិច្ចព្រមព្រៀងឈប់បាញ់"។ ប្រធានាធិបតីអាមេរិក លោក Donald Trump បាននិយាយរួចហើយថា លោកនឹងពិចារណាអនុញ្ញាតឱ្យកងកម្លាំងអ៊ីស្រាអែល បន្តការប្រយុទ្ធឡើងវិញនៅហ្កាហ្សា ប្រសិនបើក្រុមហាម៉ាស បរាជ័យក្នុងការរក្សាបទឈប់បាញ់ ដែលលោកបានសម្របសម្រួល៕