អត្ថបទអត្ថាធិប្បាយរបស់សារព័ត៌មានរ៉យទ័រ បានរៀបរាប់កាលពីថ្ងៃសុក្រ (១៧ តុលា) ថា នៅពេលដែលមេដឹកនាំរុស្ស៊ី លោក Vladimir Putin ឈានជើងចូលប្រទេសហុងគ្រី — ដែលជាសហភាពអឺរ៉ុប និងសមាជិកណាតូផងដែរ — សម្រាប់កិច្ចប្រជុំកំពូលជាថ្មីជាមួយលោកប្រធានាធិបតីអាមេរិក Donald Trump នោះនឹងធ្វើឱ្យសម្ព័ន្ធមិត្តអ៊ុយក្រែនទាំងនេះឈរមើលទាំងមិនស្រួលក្នុងចិត្ត ខណៈពួកគេស្វះស្វែងផ្តាច់លោក Putin ឱ្យនៅឯកោលើឆាកអន្តរជាតិ។

លោក Trump បាននិយាយកាលពីថ្ងៃព្រហស្បតិ៍កន្លងទៅថា លោកអាចនឹងជួបសមភាគីរុស្ស៊ី នៅទីក្រុងប៊ុយដាប៉ែស ក្នុងពេលពីរសប្តាហ៍បន្ទាប់ ដោយប្រកាន់ជំហរផ្សះផ្សាកាន់តែខ្លាំងចំពោះរុស្ស៊ី ស្របពេលដែលបង្កើតរូបភាពហាក់ដូចជាទីក្រុងវ៉ាស៊ីនតោន អាចបញ្ជូនមីស៊ីល Tomahawk ទៅជួយអ៊ុយក្រែន។

ការរើសធ្វើកិច្ចប្រជុំកំពូលនៅហុងគ្រី — ដែលជាសមាជិករបស់ប្លុកដែលបានដឹកនាំកិច្ចប្រឹងប្រែងអន្តរជាតិដើម្បីជួយអ៊ុយក្រែន និងដាក់រុស្ស៊ីឱ្យនៅឯកោ — បានធ្វើឱ្យមានការងឿងឆ្ងល់ជាខ្លាំងក្នុងចំណោមអ្នកការទូត និងអ្នកវិភាគ។ ហុងគ្រីនោះហើយ ដែលក្នុងឆ្នាំ១៩៩៤ អាមេរិក អង់គ្លេស និងរុស្ស៊ី បានចុះហត្ថលេខាលើអនុស្សរណៈទីក្រុងប៊ុយដាប៉ែស ដោយផ្តល់ឱ្យអ៊ុយក្រែននូវការធានាសន្តិសុខ ជាថ្នូរនឹងទីក្រុងគីវ បោះបង់អាវុធនុយក្លេអ៊ែររបស់ខ្លួន។

មន្ត្រីជាន់ខ្ពស់អឺរ៉ុបខាងលិចម្នាក់និយាយថា "ទស្សនកិច្ចនោះដូចជាឆ្គាំឆ្គងណាស់ និងពិបាកទ្រាំមើលមែនទែនសម្រាប់ទាំងសហភាពអឺរ៉ុប និងណាតូ ជាពិសេសរឿងពេលវេលា ខណៈការការគំរាមកំហែង Tomahawk ក៏កំពុងកើនឡើង ហើយភ្លាមៗនោះស្រាប់តែលោក Putin ចង់ជួប ... ប៉ុន្តែប្រសិនបើលោក Trump អាចធ្វើរឿងអស្ចារ្យមួយបាន នោះលោកគួរតែធ្វើឱ្យសម្រេច"។

លោក Putin បានរងដីកាចាប់ខ្លួនពីតុលាការព្រហ្មទណ្ឌអន្តរជាតិ (ICC) ជុំវិញជម្លោះអ៊ុយក្រែន ប៉ុន្តែអ្នកជំនាញរំពឹងថា រឿងនេះនឹងមិនមែនជាបញ្ហាសម្រាប់លោកឡើយនៅប៊ុយដាប៉ែស ព្រោះនាយករដ្ឋមន្រ្តីហុងគ្រី Viktor Orban ធ្លាប់ប្រកាសក្នុងខែមេសាថា ហុងគ្រីនឹងដកខ្លួនចេញពីតុលាការ ICC នោះ៕