ប្រេសិតរបស់វិមានក្រឹមឡាំង បានស្នើឡើងនូវផែនការថា រុស្ស៊ី និងសហរដ្ឋអាមេរិក គួរតែសាងសង់ផ្លូវរូងក្រោមដីដាក់ឈ្មោះថា "ពូទីន-ត្រាំ" នៅក្រោមច្រកសមុទ្រប៊ែរីង ដើម្បីតភ្ជាប់ប្រទេសទាំងពីរ នៅក្នុងកិច្ចប្រឹងប្រែងបើកដំណើរការរុករកធនធានធម្មជាតិ និង "ឯកភាពគ្នាជានិមិត្តរូប"។

គម្រោងដែលស្នើឡើងដោយលោក Kirill Dmitriev — បេសកជនវិនិយោគរបស់លោកប្រធានាធិបតី Vladimir Putin និងជាប្រធានមូលនិធិទ្រព្យសម្បត្តិអធិបតេយ្យ RDIF របស់រុស្ស៊ី — បានប៉ាន់ស្មានការសាងសង់ដែលមានតម្លៃ ៨ពាន់លានដុល្លារអាមេរិក ដែលផ្តល់មូលនិធិដោយទីក្រុងមូស្គូ និង "ដៃគូអន្តរជាតិ" ដើម្បីសាងសង់បណ្ដាញផ្លូវដែកចម្ងាយ ១១២គីឡូម៉ែត្រ ក្នុងរយៈពេលតិចជាង ៨ឆ្នាំ។

លោក Dmitriev ដែលបានជួយត្រួសត្រាយផ្លូវដើម្បីស្តារទំនាក់ទំនងរវាងអាមេរិក និងរុស្ស៊ីឡើងវិញ បានបង្ហើបគំនិតនេះឡើងកាលពីល្ងាចថ្ងៃព្រហស្បតិ៍កន្លងទៅ បន្ទាប់ពីលោក Putin បានសន្ទនាតាមទូរសព្ទជាមួយលោកប្រធានាធិបតីអាមេរិក Donald Trump និងយល់ព្រមជួបគ្នាក្នុងទីក្រុងប៊ុយដាប៉ែស ដើម្បីស្វែងរកវិធីបញ្ឈប់សង្គ្រាមនៅអ៊ុយក្រែន។

លោក Dmitriev បានសរសេរលើបណ្ដាញសង្គម X ថា៖ “ក្តីសុបិននៃការតភ្ជាប់រវាងអាមេរិក និងរុស្ស៊ី តាមច្រកសមុទ្រប៊ែរីង បានឆ្លុះបញ្ចាំងពីចក្ខុវិស័យយូរអង្វែង — ពីផ្លូវដែកស៊ីបេរី-អាឡាស្កា ឆ្នាំ១៩០៤ រហូតដល់ផែនការឆ្នាំ២០០៧ របស់រុស្ស៊ី។ មូលនិធិរុស្ស៊ី RDIF បានសិក្សាសំណើដែលមានស្រាប់ រួមទាំងផ្លូវដែកអាមេរិក-កាណាដា-រុស្ស៊ី-ចិន ហើយនឹងគាំទ្រដល់លទ្ធភាពណាដែលជោគជ័យបំផុត”។

នៅពេលត្រូវសាកសួរពីគំនិតនេះកាលពីថ្ងៃសុក្រអំឡុងកិច្ចប្រជុំទីក្រុងវ៉ាស៊ីនតោនជាមួយប្រធានាធិបតីអ៊ុយក្រែន — លោក Trump បានហៅគំនិតនេះថា "គួរឱ្យចាប់អារម្មណ៍"។ គួរឱ្យដឹងថា ច្រកសមុទ្រប៊ែរីង ដែលមានទទឹង ៨២គីឡូម៉ែត្រនោះ គឺជាចំណុចខណ្ឌចែកតំបន់ Chukotka ដ៏ធំទូលាយរបស់រុស្ស៊ី ចេញពីរដ្ឋអាឡាស្កា របស់សហរដ្ឋអាមេរិក ហើយគំនិតដើម្បីភ្ជាប់ទីតាំងទាំងពីរនេះ ត្រូវបានគេបង្ហើបឡើងប្រហែល ១៥០ឆ្នាំមកហើយ៕