បទឈប់បាញ់ទើបមានអាយុកាលបាន៩ថ្ងៃរបស់ដែនដីហ្កាហ្សា បានស្ថិតក្រោមភាពតានតឹងកាលពីថ្ងៃអាទិត្យ បន្ទាប់ពីកងទ័ពអ៊ីស្រាអែលបាននិយាយថាខ្លួនបានបើកការវាយប្រហារតាមអាកាសនៅភាគខាងត្បូងនៃដែនដីនេះជាការឆ្លើយតបទៅនឹងការវាយប្រហារដែលខ្លួនអះអាងថាត្រូវបានធ្វើឡើងដោយក្រុមហាម៉ាស ប្រឆាំងនឹងកងកម្លាំងរបស់ខ្លួន។

យ៉ាងណាក៏ដោយ ក្រុមហាម៉ាស បានអះអាងថា ខ្លួនបានប្រកាន់ខ្ជាប់នូវបទឈប់បាញ់ ដោយមន្ត្រីមួយរូបបានចោទប្រកាន់អ៊ីស្រាអែលពីបទបង្កើតលេស ដើម្បីបន្តការវាយប្រហាររបស់ខ្លួន។

ការិយាល័យព័ត៌មានហ្កាហ្សា បានចោទអ៊ីស្រាអែលពីបទបំពានបទឈប់បាញ់ជាមួយក្រុមហាម៉ាសចំនួន៨០ លើក ចាប់តាំងពីបទឈប់បាញ់បានចូលជាធរមានកាលពីថ្ងៃ១០តុលា ដោយបានសម្លាប់ជនជាតិប៉ាឡេស្ទីន៤២ នាក់ និងជាង១០០ នាក់ផ្សេងទៀតរងរបួស។  

ចំណែកការិយាល័យរបស់នាយករដ្ឋមន្ត្រីអ៊ីស្រាអែលលោកBenjamin Netanyahuបាននិយាយនៅក្នុងសេចក្តីថ្លែងការណ៍មួយថា លោកNetanyahu បានណែនាំកងកម្លាំងសន្តិសុខឱ្យចាត់វិធានការយ៉ាងខ្លាំងក្លាប្រឆាំងនឹងគោលដៅភេរវករនៅក្នុងតំបន់ហ្កាហ្សាស្ទ្រីប ដោយចោទប្រកាន់ក្រុមហាម៉ាសពីបទរំលោភលើបទឈប់បាញ់។

បទឈប់បាញ់ដ៏ផុយស្រួយក្នុងទឹកដីប៉ាឡេស្ទីនដែលសម្របសម្រួលដោយប្រធានាធិបតីអាមេរិក Donald Trump និងបានចូលជាធរមាននៅថ្ងៃទី ១០ ខែតុលា បាននាំឱ្យមានការបញ្ឈប់សង្គ្រាមដ៏មហន្តរាយជាងពីរឆ្នាំរវាងអ៊ីស្រាអែល និងក្រុមហាម៉ាស។

កិច្ចព្រមព្រៀងនេះបានបង្កើតឲ្យមានការដោះដូរចំណាប់ខ្មាំង និងអ្នកទោស ហើយត្រូវបានស្នើឡើងជាមួយនឹងផែនទីបង្ហាញផ្លូវដ៏មានមហិច្ឆតាសម្រាប់អនាគតរបស់ហ្កាហ្សា ប៉ុន្តែបានប្រឈមនឹងបញ្ហាភ្លាមៗក្នុងការអនុវត្ត៕