ទីក្រុងប្រវត្តិសាស្ត្រ Gyeongju របស់កូរ៉េខាងត្បូង កំពុងរៀបចំធ្វើជាម្ចាស់ផ្ទះទទួលបណ្ដាមេដឹកនាំ APEC ចាប់ពីថ្ងៃទី៣១ ខែតុលា ដល់ថ្ងៃទី១ ខែវិច្ឆិកា ខាងមុខ ដោយការយកចិត្តទុកដាក់ជាសកលបានផ្ដោតទៅលើថា តើប្រធានាធិបតីអាមេរិក លោក Donald Trump និងលោក Xi Jinping មេដឹកនាំរបស់ប្រទេសចិន នឹងជួបប្រជុំគ្នានៅខាងក្រៅវេទិកាដ៏សំខាន់នេះដែរឬទេ ស្របពេលមានការគំរាមកំហែងពន្ធថ្មី និងការប៉ះទង្គិចរឿងរ៉ែកម្រ។

រដ្ឋមន្ត្រីក្រសួងរតនាគារអាមេរិក លោក Scott Bessent និយាយថា លោក Trump និងលោក Xi នៅតែជួបគ្នាក្នុងកូរ៉េខាងត្បូងនៅចុងខែនេះតាមការគ្រោងទុក ដែលជាផ្នែកនៃកិច្ចប្រឹងប្រែងបន្ថយភាពតានតឹង បន្ទាប់ពីលោក Trump បានគំរាមយកពន្ធ ១០០% លើការនាំចូលរបស់ចិន ចាប់ពីថ្ងៃទី១ ខែវិច្ឆិកា លុះត្រាតែទីក្រុងប៉េកាំង ដកការទប់ស្កាត់ការនាំចេញលើរ៉ែសំខាន់ៗ។

ការិយាល័យប្រធានាធិបតីកូរ៉េខាងត្បូង នាពេលថ្មីៗនេះបាននិយាយថា លោក Trump ត្រូវរំពឹងថានឹងទស្សនកិច្ចនៅកូរ៉េខាងត្បូង នៅថ្ងៃទី២៩ និង ៣០ ខែតុលា។ អ្នកវិភាគខ្លះរំពឹងថា ជំនួបកំពូល APEC ខាងមុខនេះ — ដែលជាធម្មតា របៀបវារៈផ្តោតលើការសម្របសម្រួលពាណិជ្ជកម្ម — អាចនឹងមើលឃើញឆាកល្ខោនច្រើនជាងពេលធម្មតា។

ជាមួយគ្នានេះ ទូរទស្សន៍ CNN បានរាយការណ៍កាលថ្ងៃសៅរ៍ (១៨ តុលា) ដោយដកស្រង់ប្រភពដែលដឹងពីបញ្ហានេះថា ក្រុមមន្ត្រីរដ្ឋបាលលោក Trump កំពុងពិភាក្សាជាលក្ខណៈឯកជនពីជំនួបដែលអាចកើតមានរវាងលោក Trump និងមេដឹកនាំកូរ៉េខាងជើង លោក Kim Jong Un ក្នុងអំឡុងទស្សនកិច្ចនៅអាស៊ីនាពេលខាងមុខរបស់ប្រធានាធិបតីអាមេរិក។

របាយការណ៍បន្ថែមថា ទោះយ៉ាងណាក៏ដោយ ក្រុមមន្ត្រីមិនទាន់បានចាប់ផ្តើមការរៀបចំផ្នែកភស្តុភារ ឬទំនាក់ទំនងផ្ទាល់ជាមួយទីក្រុងព្យុងយ៉ាងទេ ហើយការលើកឡើងពីមុនរបស់លោក Trump នៅដើមឆ្នាំនេះ ដែលមានបំណងជួបជាមួយលោក Kim ត្រូវរាយការណ៍ថាបានបដិសេធដោយកូរ៉េខាងជើង៕