ប្រធានាធិបតីអាមេរិក លោក Donald Trump បានរំលឹកឡើងវិញកាលពីថ្ងៃអាទិត្យ (១៩ តុលា) ថា នាយករដ្ឋមន្ត្រីឥណ្ឌា Narendra Modi បានប្រាប់លោកថា ឥណ្ឌានឹងឈប់ទិញប្រេងពីរុស្ស៊ីទៀតហើយ ខណៈព្រមានថា ទីក្រុងញូវដែលី នឹងបន្តបង់ពន្ធដ៏ច្រើន ប្រសិនបើមិនព្រមបញ្ឈប់ការនាំចូលប្រេងរបស់ទីក្រុងមូស្គូទេនោះ។

ថ្លែងប្រាប់អ្នកយកព័ត៌មានយន្តហោះ AirForce One លោក Trump បាននិយាយថា "លោកបានសន្ទនាជាមួយនាយករដ្ឋមន្រ្តីឥណ្ឌា ហើយលោក Modi បានប្រាប់ថានឹងមិនបន្តទិញប្រេងរុស្ស៊ីទេ"។ នៅពេលត្រូវសាកសួរទាក់ទងនឹងការអះអាងរបស់ឥណ្ឌា ដែលថាខ្លួនមិនបានដឹងពីការសន្ទនាណាមួយរវាងលោក Modi និង Trump ទេនោះ លោក Trump ឆ្លើយតបវិញថា "ប្រសិនបើពួកគេនៅតែនិយាយបែបនេះ ឥណ្ឌានឹងបន្តបង់ពន្ធដ៏ធំ"។

ប្រេងរបស់រុស្ស៊ី បានក្លាយជាការខឹងសម្បារដ៏ធំមួយរបស់លោក Trump ក្នុងកិច្ចពិភាក្សាពាណិជ្ជកម្មដ៏យូរជាមួយឥណ្ឌា - ដែលពាក់កណ្តាលនៃពន្ធ ៥០% របស់លោកលើទំនិញឥណ្ឌា គឺជាការសងសឹកចំពោះការទិញប្រេងទាំងនោះ។ រដ្ឋាភិបាលអាមេរិកនិយាយថា ប្រាក់ចំណូលប្រេងជាប្រភពផ្តល់មូលនិធិដល់សង្គ្រាមរុស្ស៊ី នៅអ៊ុយក្រែន។

កាលពីថ្ងៃពុធសប្ដាហ៍មុន លោក Trump និយាយថា លោក Modi បានសន្យានៅថ្ងៃនោះថាឥណ្ឌានឹងបញ្ឈប់ការទិញប្រេងពីរុស្ស៊ីតទៅទៀត។ ទោះយ៉ាងនេះក្ដី ក្រសួងការបរទេសឥណ្ឌាបែរជានិយាយថា ខ្លួនមិនបានដឹងពីកិច្ចសន្ទនាណាមួយរវាងមេដឹកនាំនៅថ្ងៃនោះឡើយ ប៉ុន្តែក៏និយាយថា ក្ដីបារម្ភចម្បងរបស់ទីក្រុងញូវដែលីគឺ "ការពារផលប្រយោជន៍របស់អតិថិជនឥណ្ឌា"៕