​ចិន៖ ប្រធានាធិបតី​ចិន​លោក Xi Jinping បាន​ជួប​ជាមួយ​មេដឹកនាំ​មកពី​ប្រទេស​ប៉ូឡូញ អា​ហ្ស​ង់​ទីន ប៉ា​គី​ស្ថាន និង​សិង្ហ​បុរី​កាលពី​ថ្ងៃអាទិត្យនៅ​ខាងក្រៅ​ព្រឹត្តិការណ៍​កីឡា​អូឡាំពិក​រដូវរងា​ទីក្រុងប៉េកាំង​។ លោក Xi Jinping បាន​ប្រាប់​ប្រធានាធិបតី​ប្រទេស​ប៉ូឡូញលោក Andrzej Duda ថា ប្រទេស​ចិន​ស្វែងរក​ការធ្វើឱ្យ​ប្រសើរឡើងបន្ថែមទៀត​ នូវ​ទំនាក់ទំនង​ជាមួយ​ប្រទេស​ប៉ូឡូញដែលទំនាក់ទំនង​កក់ក្តៅ​ជាមួយ​ទីក្រុង​ប៉េកាំង មិនសូវ​ល្អជា​មួយគូ​ប្រជែងសំខាន់​របស់​សហរដ្ឋអាមេរិក​។

ប៉ូឡូញគឺជា​ប្រទេស​តែមួយគត់របស់​សហភាព​អឺរ៉ុប ដែល​បាន​បញ្ជូន​មេដឹកនាំ​ជាប់ឆ្នោត​ម្នាក់ទៅ​ចូលរួម​ក្នុង​ព្រឹត្តិការណ៍​ប្រកួត​កីឡា ទោះបីជា​មានការ​ធ្វើពហិកា​រ​ផ្នែក​ការទូតដឹកនាំ​ដោយ​សហរដ្ឋអាមេរិក​ក៏ដោយ​។ ជំនួប​នេះ​ធ្វើឡើង​ក្នុង​ពេល​មានការ​ព្រួយបារម្ភ​ ជុំវិញ​ការវាយប្រហារ​របស់​ប្រទេស​រុស្ស៊ី​លើ​ប្រទេស​អ៊ុយ​ក្រែ​ន ដែល​ប្រទេស​ប៉ូឡូញ​សមាជិក​អង្គការ​ណា​តូ​មាន​ព្រំដែន​រួម​វែង​។ លោក Xi បាន​និយាយ​ថា ប្រទេស​ចិន​បាន​ត្រៀមខ្លួន​ជាស្រេចដើម្បី​ចូលរួម​យ៉ាងសកម្ម​ ក្នុង​ការ​សាង​សង់​មជ្ឈមណ្ឌល​ដឹកជញ្ជូន​នៅ​ក្នុង​ប្រទេស​ប៉ូឡូញ និង​ជួយ​ប៉ូឡូញ​ឱ្យ​ក្លាយ​ជា​ចំណុច​សំខាន់នៅ​ក្នុង​ខ្សែ​សង្វាក់​ផ្គត់ផ្គង់​ប្រទេស​ចិន​-​អឺរ៉ុប​។ ​​អា​ហ្ស​ង់​ទីនជា​ប្រទេស​អាមេរិក​ឡាទីន​ធំ​ដំបូង​គេ ​ដែល​ចូលរួម​គំនិត​ផ្តួចផ្តើម​ខ្សែក្រវាត់​និង​ផ្លូវ​របស់​ប្រទេស​ចិន​។

លោក Xi បាន​ប្រាប់​ប្រធានាធិបតីលោក Alberto Fernández ថា​ ប្រទេស​ចិនមាន​ឆន្ទៈ​ជំរុញ​ការផ្លាស់ប្តូរ និង​កិច្ចសហប្រតិបត្តិការក្រោម​ភាពជា​ដៃគូ​យុទ្ធសាស្ត្រ​។ ប្រទេស​ទាំងពីរ​កំពុង​ពិភាក្សាគ្នាដើម្បី​សាងសង់​រោងចក្រ​ថាមពលនុយក្លេអ៊ែរ​ដំបូង​ របស់​ប្រទេស​អា​ហ្ស​ង់​ទីន ចាប់តាំងពី​ឆ្នាំ១៩៨១ ដោយមាន​ជំនួយ​ពី​ប្រទេស​ចិន​។ នៅក្នុង​ជំនួប​ដាច់ដោយឡែក​មួយ​ជាមួយនាយក​រដ្ឋមន្ត្រី​ប៉ា​គី​ស្ថានលោក Imran Khan លោក Xi បាន​សន្យា​កិច្ចសហប្រតិបត្តិការ​កាន់​តែ​ជិតស្និទ្ធ ក្រោម​កម្មវិធី​វិនិយោគ​ច្រករបៀង​សេដ្ឋកិច្ច​ចិន​-​ប៉ា​គី​ស្ថានដើម្បី​សាងសង់​ផ្លូវ រោងចក្រ​ថាមពល និង​ហេដ្ឋារចនាសម្ព័ន្ធ​ផ្សេងទៀត​។ ​ក្នុង​ជំនួប​ជាមួយ​ប្រធានាធិបតី​សិង្ហ​បុរី​លោកស្រី Halimah Yacob លោក Xi បាន​និយាយថា ទំនាក់​ទំនង​របស់​ប្រទេស​ទាំងពីរ​​កាន់តែ​ស៊ីជម្រៅ​ ចាប់តាំងពី​ដំណើរ​ទស្សនកិច្ច​របស់​លោក​ក្នុង​ឆ្នាំ២០១៥៕

អត្ថបទ៖ ប៊ុនថន