ក្រុមមន្ត្រីបារាំង បាននិយាយថា ចោរមួយក្រុមពាក់ស្រោមមុខពណ៌ខ្មៅ បានទម្លុះបង្អួចចូលទៅក្នុងសារមន្ទីរ Louvre ដ៏ប្រវត្តិសាស្រ្តរបស់ទីក្រុងប៉ារីស កាលពីថ្ងៃអាទិត្យ (១៩ តុលា) ដោយប្រើឧបករណ៍ស្ទូចវាយកម្ទេចទ្វារបង្អួចជាន់លើរបស់អគារ បន្ទាប់មកលួចវត្ថុមានតម្លៃ "ដែលមិនអាចកាត់ថ្លៃបាន" ពីទីតាំងដាក់គ្រឿងអលង្ការមកុដរបស់បារាំង ក្រោយមកទៀតក៏ជិះម៉ូតូរត់គេចខ្លួនបាត់ទៅ។

ករណីប្លន់នេះបង្កជាសំណួរដែលពិបាកឆ្លើយ អំពីសន្តិសុខក្នុងសារមន្ទីរ ខណៈមន្ត្រីបានព្រមានពីមុនរួចមកហើយថា ខ្វះការវិនិយោគផ្នែកសុវត្ថិភាព នៅទីតាំងដ៏ល្បីល្បាញលើពិភពលោក ដែលផ្ទុកស្នាដៃសិល្បៈកម្រដូចជា រូបគំនូរម៉ូណាលីសា ដែលមានអ្នកទៅទស្សនា ៨,៧លាននាក់ ក្នុងឆ្នាំ២០២៤។

រដ្ឋអាជ្ញាទីក្រុងប៉ារីស លោកស្រី Laure Beccuau បាននិយាយថា ចោរកម្មកើតឡើងនៅម៉ោងក្នុងស្រុកប្រហែល ៩:៣០នាទីព្រឹក នៅពេលសារមន្ទីរបើកទ្វារជាសាធារណៈ ដោយពួកចោរទម្លុះចូលអគារមួយរបស់សារមន្ទីរ ហើយសកម្មភាពប្លន់នេះចំណាយពេលចន្លោះពី ៦ទៅ ៧នាទីប៉ុណ្ណោះ ធ្វើឡើងដោយចោរគ្នា ៤នាក់ដែលស្ទាត់ជំនាញ និងគ្មានអាវុធទេ ប៉ុន្តែបានគំរាមមន្រ្តីសន្តិសុខដោយប្រើម៉ាស៊ីនកិនមុំ (ឬហៅថា ម៉ូទ័រកាត់គ្រឿងសំណង់)។

ដំបូងឡើយ វត្ថុសរុបចំនួន ៩យ៉ាង ត្រូវបានក្រុមឧក្រិដ្ឋជនកំណត់មុខសញ្ញា ប៉ុន្តែមានតែគ្រឿងអលង្ការ ៨យ៉ាងប៉ុណ្ណោះ ត្រូវបានលួចពិតប្រាកដ។ លោកស្រី Beccuau និយាយថា ចោរបានបាត់វត្ថុទី៩ អំឡុងពេលរត់គេចខ្លួន នោះគឺជាមកុដរបស់ព្រះមេហេសីស្ដេចណាប៉ូឡេអុងទី៣ គឺរាជនី Eugenie។ រដ្ឋមន្ត្រីមហាផ្ទៃ និយាយថា ការស៊ើបអង្កេតប្រគល់ឱ្យទៅអង្គភាពនគរបាលឯកទេស ដែលមានអត្រាជោគជ័យខ្ពស់ក្នុងការបង្ក្រាបអំពើប្លន់ទម្រង់ខ្ពស់បែបនេះ៕