អង្គការសហប្រជាជាតិបានបញ្ជាក់ថា អាជ្ញាធរក្រុមហ៊ួទីនៅប្រទេសប្រទេសយេម៉ែន បានឃុំខ្លួនបុគ្គលិកអង្គការសហប្រជាជាតិប្រមាណ២០នាក់ បន្ទាប់ពីបានឆ្មក់ចូលទីតាំងគ្រប់គ្រងដោយអង្គការសហប្រជាជាតិមួយផ្សេងទៀតក្នុងរដ្ឋធានីសាណា។

លោក Jean Alam អ្នកនាំពាក្យអ្នកសម្របសម្រួលពលរដ្ឋរបស់អង្គការសហប្រជាជាតិប្រចាំប្រទេសយេម៉ែន បាននិយាយថា បុគ្គលិកត្រូវបានឃុំខ្លួននៅក្នុងបរិវេណមួយកន្លែងក្នុងស្រុក Hada នៃទីក្រុងកាលពីថ្ងៃអាទិត្យ។ អ្នកទាំងឡាយ ដែលត្រូវបានចាប់ខ្លួនរួមមានបុគ្គលិកយេម៉ែនយ៉ាងហោចណាស់ប្រាំនាក់និងបុគ្គលិកអន្តរជាតិចំនួន១៥នាក់។ បុគ្គលិកអង្គការសហប្រជាជាតិចំនួន១១នាក់បន្ថែមទៀតត្រូវបានសាកសួរ ហើយក្រោយមកត្រូវបានដោះលែងវិញ។

លោក Alam បាននិយាយថា អង្គការសហប្រជាជាតិកំពុងទាក់ទងដោយផ្ទាល់ជាមួយក្រុមហ៊ួទី និងអ្នកពាក់ព័ន្ធផ្សេងទៀត «ដើម្បីដោះស្រាយស្ថានការណ៍ដ៏ធ្ងន់ធ្ងរនេះឱ្យបានលឿនតាមដែលអាចធ្វើទៅបាន ដើម្បីបញ្ចប់ការឃុំខ្លួនបុគ្គលិកទាំងអស់ និងស្ដារឡើងវិញការគ្រប់គ្រងពេញលេញនៅទីតាំងរបស់ខ្លួននៅក្នុងទីក្រុងសាណា»។

មន្ត្រីអង្គការសហប្រជាជាតិមួយរូបផ្សេងទៀត បាននិយាយថា កងកម្លាំងហ៊ួទី បានរឹបអូសឧបករណ៍ទំនាក់ទំនងទាំងអស់នៅខាងក្នុងទីតាំង រួមមានកុំព្យូទ័រ ទូរស័ព្ទ និងម៉ាស៊ីន Server។

តាមសេចក្តីរាយការណ៍ បុគ្គលិកត្រូវបានគេរាយការណ៍ថាជាបុគ្គលិករបស់ទីភ្នាក់ងារអង្គការសហប្រជាជាតិមួយចំនួនដែលក្នុងនោះមានកម្មវិធីស្បៀងអាហារពិភពលោក(WFP) ទីភ្នាក់ងារកុមារUNICEF និងការិយាល័យសម្របសម្រួលកិច្ចការមនុស្សធម៌(OCHA)។