បណ្ដាញការទូតរបស់សហភាពអឺរ៉ុប ឈ្មោះថា EEAS កំពុងជំរុញឱ្យរដ្ឋសមាជិក គាំទ្រសេចក្តីប្រកាសដែនសមុទ្រមួយ ដែលនឹងអនុញ្ញាតឱ្យបណ្តាប្រទេសសហភាពអឺរ៉ុប ដែលមានទង់ជាតិប្លុក រៀបចំការត្រួតពិនិត្យលើ "កងនាវាស្រមោល" របស់រុស្ស៊ី នៃនាវាដឹកប្រេង នេះបើតាមឯកសារសេចក្ដីព្រាងរបស់បណ្ដាញទូតនោះ។

ការបង្កើនសិទ្ធិអធិការកិច្ច ឬត្រួតពិនិត្យនេះ គឺជាសំណើចុងក្រោយបង្អស់របស់ប្លុកអឺរ៉ុប ដែលមានបំណងទប់ស្កាត់ប្រាក់ចំណូលពីប្រេង និងឧស្ម័នរបស់រុស្ស៊ី ដែលត្រូវប្រើប្រាស់ដោយទីក្រុងមូស្គូ ដើម្បីផ្តល់ហិរញ្ញប្បទានដល់សង្រ្គាមនៅអ៊ុយក្រែន។ រដ្ឋមន្ត្រីការបរទេស EU គ្រោងជួបប្រជុំគ្នានៅថ្ងៃចន្ទ (២០ តុលា) នេះ ដើម្បីពិភាក្សាអំពីវិធានការថ្មីប្រឆាំងនឹងរុស្ស៊ី ក្នុងចំណោមប្រធានបទផ្សេងទៀត។

នៅដើមខែតុលា ក្រុមប្រទេសមានឧស្សាហកម្មលូតលាស់ទាំងប្រាំពីរ (G7) បានយល់ព្រមធ្វើការរួមគ្នាឆ្ពោះទៅរកគោលដៅនេះ និងកំណត់គោលដៅលើប្រទេសណាដែលជួយក្រុងទីក្រុងមូស្គូ ឱ្យជៀសផុតពីការដាក់ទណ្ឌកម្ម ក៏ដូចជាប្រទេសដែលបង្កើនការនាំចូលប្រេងពីរុស្ស៊ីជាដើម។

ឯកសារ EEAS បាននិយាយថា សេចក្តីព្រាងនៃសេចក្ដីប្រកាសដែនសមុទ្រនេះបានស្នើឱ្យមាន "កិច្ចព្រមព្រៀងទ្វេភាគីដែលអាចធ្វើទៅបាន រវាងរដ្ឋទង់ជាតិ និងសហភាពអឺរ៉ុប ស្តីពីការអនុញ្ញាតជាមុនសម្រាប់ការត្រួតពិនិត្យ" ដោយបន្ថែមថា កំណើនការចុះឈ្មោះទង់ជាតិក្លែងក្លាយ ក៏ត្រូវការដោះស្រាយផងដែរ៕