អនុប្រធានាធិបតីសហរដ្ឋអាមេរិកនិយាយថា កងរក្សាសន្តិភាពអន្តរជាតិចាំបាច់ត្រូវដាក់ពង្រាយទៅកាន់តំបន់ហ្កាហ្សា ដើម្បីរក្សាសន្តិសុខក្នុងដែនដីនោះ មុនពេលក្រុមហាម៉ាសរំសាយអាវុធ។

លោក Vance បាននិយាយទៅកាន់អ្នកសារព័ត៌មានថា «មុនពេលយើងអាចធានាបានថាក្រុមហាម៉ាស រំសាយអាវុធដោយសមស្រប នោះនឹងតម្រូវឱ្យរដ្ឋឈូងសមុទ្រអារ៉ាប់មួយចំនួនទទួលយកកងកម្លាំងនៅទីនោះ ដើម្បីអនុវត្តច្បាប់ និងសណ្តាប់ធ្នាប់ និងការការពារសន្តិសុខនៅមូលដ្ឋាននោះ»។

លោកបាននិយាយបន្ថែមថា «យើងមិនទាន់មានហេដ្ឋារចនាសម្ព័ន្ធសន្តិសុខនៅនឹងកន្លែងនៅឡើយ ដែលមានន័យថារដ្ឋឈូងសមុទ្រអារ៉ាប់ដែលជាសម្ព័ន្ធមិត្តរបស់យើងមិនទាន់មានហេដ្ឋារចនាសម្ព័ន្ធសន្តិសុខដើម្បីបញ្ជាក់ថាក្រុមហាម៉ាសរំសាយអាវុធ»។

យោងតាមសេចក្តីរាយការណ៍ប្រព័ន្ធផ្សព្វផ្សាយជាច្រើនរបស់សហរដ្ឋអាមេរិកនិងអ៊ីស្រាអែល លោក Vance មានផែនការទៅធ្វើទស្សនកិច្ចនៅអ៊ីស្រាអែល នៅប៉ុន្មានថ្ងៃខាងមុខនេះ។

យោធាអ៊ីស្រាអែល បាននិយាយថា ខ្លួនបានវាយប្រហារគោលដៅនានារបស់ក្រុមហាម៉ាសនៅទូទាំងតំបន់ហ៊ុមព័ទ្ធ រួមមានទាំងគោលដៅលើមេបញ្ជាការតំបន់ ខ្មាន់កាំភ្លើង ផ្លូវរូងក្រោមដី និងឃ្លាំងអាវុធ បន្ទាប់ពីក្រុមសកម្មប្រយុទ្ធបានបាញ់មីស៊ីលប្រឆាំងរថក្រោះ និងបានបាញ់ទៅលើកងទ័ពរបស់ខ្លួន ដោយបានសម្លាប់ទាហានច្រើននាក់។