អ្នកទទួលជ័យជម្នះក្នុងការបោះឆ្នោតរបស់ប្រទេសបូលីវី លោក Rodrigo Paz បាននិយាយកាលពីថ្ងៃអាទិត្យ ទី១៩ ខែតុលា ឆ្នាំ២០២៥ ថា លោកនឹងបញ្ចប់កង្វះប្រេងឥន្ធនៈដែលកំពុងរួមរឹតនៅក្នុងប្រទេសនេះ បន្ទាប់ពីទទួលបានសំឡេងគាំទ្រ៥៤,៥% ដោយបានទទួលជ័យជម្នះលើគូប្រជែង លោក Jorge "Tuto" Quiroga។ លោក Paz បាននិយាយដូច្នេះ បន្ទាប់ពីតុលាការកំពូលរៀបចំការបោះឆ្នោត បានប្រកាសលទ្ធផលបឋម និងបន្ទាប់ពី លោក Quiroga ទទួលស្គាល់ការបរាជ័យ។

ជ័យជម្នះរបស់សមាជិកព្រឹទ្ធសភាវ័យ៥៨ឆ្នាំរូបនេះ គឺជាការផ្លាស់ប្តូរជាប្រវត្តិសាស្ត្រមួយសម្រាប់ប្រទេសនៅអាមេរិកខាងត្បូងមួយនេះ គ្រប់គ្រងស្ទើរតែជាបន្តបន្ទាប់ចាប់តាំងពីឆ្នាំ២០០៦ដោយចលនាសង្គមនិយមរបស់ប្រទេសបូលីវី ឬ MAS ដែលធ្លាប់ទទួលបានការគាំទ្រយ៉ាងច្រើនលើសលប់ពីជនជាតិដើមភាគតិចរបស់ប្រទេស។

ប្រធានាធិបតីថ្មី នឹងចូលកាន់តំណែងនៅថ្ងៃទី៨ ខែវិច្ឆិកា ខាងមុខ។ សេដ្ឋកិច្ចដ៏ផុយស្រួយរបស់ប្រទេសបូលីវី បានគ្របដណ្ដប់លើយុទ្ធនាការបោះឆ្នោតជុំទី២។ 

នៅពេលដែលការនាំចេញឧស្ម័នធម្មជាតិយ៉ាងច្រើនបានធ្លាក់ចុះ អតិផរណាមានកម្រិតខ្ពស់ក្នុងរយៈពេល៤០ឆ្នាំមកនេះ ហើយមានកង្វះប្រេងឥន្ធនៈ។ កាលពីចុងខែកញ្ញា លោក Paz បានបង្ហាញផែនការសម្រាប់កិច្ចព្រមព្រៀងកិច្ចសហប្រតិបត្តិការសេដ្ឋកិច្ចចំនួន ១,៥ពាន់លានដុល្លារជាមួយមន្ត្រីសហរដ្ឋអាមេរិក ដើម្បីធានាបានការផ្គត់ផ្គង់ប្រេងឥន្ធនៈ។