ប្រជាជនប៉ាគីស្ថានកាលពីថ្ងៃអាទិត្យ ទី១៩ ខែតុលា បានស្វាគមន៍កិច្ចព្រមព្រៀងបទឈប់បាញ់រវាងប៉ាគីស្ថាន និងអាហ្វហ្គានីស្ថាន ក្រោយការប៉ះទង្គិចគ្នានៅតាមបណ្តោយព្រំដែនដ៏ខ្លាំងក្លាមួយសប្តាហ៍ ដែលបានបង្ហាញពីអំពើហិង្សាដ៏បង្ហូរឈាមបំផុតរវាងប្រទេសជិតខាងទាំងពីរ ចាប់តាំងពីក្រុមតាលីបង់បានចូលកាន់កាប់ទីក្រុងកាប៊ុល ក្នុងឆ្នាំ២០២១។ 

រដ្ឋមន្ត្រីការពារជាតិប៉ាគីស្ថាន លោក Khawaja Muhammad Asif បានបង្ហោះនៅលើបណ្តាញសង្គម X កាលពីថ្ងៃអាទិត្យ បន្ទាប់ពីកិច្ចពិភាក្សានៅទីក្រុងដូហា ប្រទេសកាតា ថា បទឈប់បាញ់ «ត្រូវបានបញ្ជាក់បញ្ចប់ចុងក្រោយ» ដោយនិយាយថាភាគីទាំងពីរនឹងជួបគ្នាម្តងទៀតនៅថ្ងៃទី២៥ ខែតុលា នៅទីក្រុងអ៊ីស្តង់ប៊ុល ប្រទេសទួរគី ដើម្បីពិភាក្សាអំពី «បញ្ហាលម្អិត»។ អ្នកនាំពាក្យក្រុមតាលីបង់ លោក Zabihullah Mujahid បាននិយាយនៅក្នុងសេចក្តីថ្លែងការណ៍ថា ភាគីទាំងពីរបានព្រមព្រៀងលើបទឈប់បាញ់ពេញលេញ និងមានន័យ។ 

ពលរដ្ឋនៅក្នុងទីក្រុង Karachi បានមើលឃើញកិច្ចព្រមព្រៀងនេះថាជាការវិវឌ្ឍន៍ជាវិជ្ជមាន និងក្តីសង្ឃឹម ដោយនិយាយថាប្រទេសទាំងពីរដែលជាប្រទេសមូស្លីមនៅជិតខាង គួរតែ «រស់នៅជាមួយគ្នាដោយសុខដុមរមនា»។ 

អ្នកស្រុក Rawalpindi ម្នាក់ដែលកំពុងធ្វើដំណើរនៅក្នុងទីក្រុង Islamabad បានសម្តែងការព្រួយបារម្ភអំពីភាពតានតឹងនៅក្នុងសហគមន៍រវាងប្រជាជនអាហ្វហ្គានីស្ថាននិងប្រជាជនប៉ាគីស្ថាន។