អស់ពេលពីរឆ្នាំមកហើយ ពលរដ្ឋប៉ាឡេស្ទីននៅដែនដីហ្កាហ្សា តែងសុបិនចង់បានបទឈប់បាញ់ ខណៈពេលរត់ភៀសខ្លួនអស់ជាច្រើនដង អំឡុងសង្រ្គាមហ្កាហ្សា ហើយជួបការលំបាកក្នុងការស្វែងរកអាហារចិញ្ចឹមគ្រួសារ ស្របពេលវិបត្តិអត់ឃ្លានដ៏អាក្រក់។ នៅពេលបទឈប់បាញ់ត្រូវប្រកាសកាលពីថ្ងៃទី១០ ខែតុលា អ្នកស្រុកត្រេកអរជាខ្លាំង ដោយគិតថាអាចសម្រាកបាន បើទោះជាផ្ទះសម្បែងពួកគេនៅតែញាំញីដោយភាពវឹកវរក៏ដោយ តែយ៉ាងហោចណាស់ក៏បានដឹងថា គ្រួសាររបស់ពួកគេនឹងមិនរងការវាយប្រហារដោយគ្រាប់បែករបស់អ៊ីស្រាអែលទៀតទេ។ 

យ៉ាងណាមិញ សន្តិភាពដ៏ផុយស្រួយត្រូវរង្គោះរង្គើនៅព្រឹកថ្ងៃអាទិត្យ (១៩ តុលា) ដោយរលកនៃការវាយប្រហារតាមអាកាសរបស់អ៊ីស្រាអែល នៅទូទាំងតំបន់ហ្កាហ្សា បន្ទាប់ពីអ៊ីស្រាអែលអះអាងថា ពួកសកម្មប្រយុទ្ធហាម៉ាសកំណត់គោលដៅលើកងទ័ពរបស់ខ្លួននៅភាគខាងត្បូងហ្កាហ្សា។ អ៊ីស្រាអែល ប្រកាសបន្តបទឈប់បាញ់ឡើងវិញ ហើយលោកប្រធានាធិបតីអាមេរិក Donald Trump ក៏និយាយថា បទឈប់បាញ់ហ្កាហ្សា នៅតែជាធរមាន ប៉ុន្តែភាពភ័យខ្លាចរបស់អ្នកស្រុកនៅតែមិនធូរស្បើយ។

រយៈពេល ៩ថ្ងៃចូលក្នុងបទឈប់បាញ់ --គិតត្រឹមថ្ងៃអាទិត្យ ទី១៩ ខែតុលា-- ប្រជាជនប៉ាឡេស្ទីននៅហ្កាហ្សា បាននិយាយថា ពួកគេបារម្ភកាន់តែខ្លាំងឡើងថាបទឈប់បាញ់ដ៏ផុយស្រួយនេះ អាចដួលរលំបានគ្រប់ពេលទាំងអស់ ហើយសង្រ្គាមពេញលក្ខណៈនឹងចាប់ផ្តើមឡើងវិញ។

ការភ័យខ្លាចទាំងនេះដោយសាររឿងដដែលៗធ្លាប់កើតមានរួចមកហើយ ដោយកាលពីខែមីនាកន្លងទៅ បទឈប់បាញ់មួយបានខ្ទេចខ្ទី បន្ទាប់ពីអ៊ីស្រាអែលបន្តការទម្លាក់គ្រាប់បែក ហើយបដិសេធមិនផ្លាស់ទៅដំណាក់កាលទីពីរនៃបទឈប់បាញ់ ដែលអាចនឹងបញ្ចប់សង្គ្រាមជាអចិន្ត្រៃយ៍នៅពេលនោះ៕