ក្រុមនិស្សិតឥណ្ឌូនេស៊ី បានរៀបចំផែនការធ្វើបាតុកម្មនៅថ្ងៃខួបកាន់អំណាចបាន ១ឆ្នាំ របស់រដ្ឋាភិបាលលោកប្រធានាធិបតី Prabowo Subianto ក្នុងទីក្រុងហ្សាកាតា នៅថ្ងៃចន្ទ (២០ តុលា) នេះ រយៈពេលពីរខែបន្ទាប់ពីបាតុកម្មដ៏ហិង្សាបានកក្រើកប្រទេស ខណៈប្រធានាធិបតីបើកកិច្ចប្រជុំគណៈរដ្ឋមន្ត្រីដើម្បីប្រារព្ធឆ្នាំដំបូងរបស់លោកនៅក្នុងតំណែង។

ក្រុមបាតុករនឹងប្រមូលផ្តុំគ្នានៅជិតវិមានប្រធានាធិបតី ដើម្បីតវ៉ាប្រឆាំងនឹងគោលនយោបាយរបស់រដ្ឋាភិបាលឥណ្ឌូនេស៊ី នេះបើតាមការបង្ហោះរបស់ក្រុមនិស្សិត ដែលស្គាល់ក្នុងស្រុកថា BEM SI នៅលើបណ្ដាញសង្គមអ៊ីនស្តារក្រាម អមដោយពាក្យហាសថេក (Hashtag) ថា "មួយឆ្នាំគ្រប់គ្រាន់ហើយ" និង "រយៈពេលមួយឆ្នាំនៃបញ្ហាមិនឈប់ឈរ"។

កាលពីចុងខែសីហា ការតវ៉ាដែលដឹកនាំដោយនិស្សិតប្រឆាំងនឹងគោលនយោបាយរដ្ឋាភិបាល និងអត្ថប្រយោជន៍សមាជិកសភា បានរីករាលដាលទូទាំងប្រទេស។ បន្ទាប់ពីមានមនុស្សម្នាក់ស្លាប់ ការតវ៉ាក៏កាន់តែកម្រោល ហើយចំនួនអ្នកស្លាប់បានកើនឡើង ដែលបង្ហាញពីបញ្ហាប្រឈមដ៏ធំបំផុតចំពោះលោក Prabowo ចាប់តាំងពីជាប់ឆ្នោតកាលពីឆ្នាំមុនមក។

លោក Wasisto Raharjo Jati អ្នកស្រាវជ្រាវនយោបាយនៅទីភ្នាក់ងារស្រាវជ្រាវ និងនវានុវត្តន៍ជាតិរបស់ឥណ្ឌូនេស៊ី បាននិយាយថា ឆ្នាំដំបូងរបស់លោក Prabowo ជួបភាពវឹកវរ ដោយសារកង្វះការចូលរួមពីសាធារណៈក្នុងគោលនយោបាយរបស់លោក ដោយលើកឡើងពីកម្មវិធីអាហារសាលាមិនគិតថ្លៃដ៏ចម្រូងចម្រាសរបស់ប្រធានាធិបតីរូបនេះ៕