រដ្ឋាភិបាលដែនដីហ្កាហ្សា បាននិយាយអះអាងក្នុងសេចក្ដីថ្លែងការណ៍មួយថា មានជនជាតិប៉ាឡេស្ទីនយ៉ាងតិច ៩៧នាក់ ត្រូវបានសម្លាប់ និងប្រមាណ ២៣០នាក់ ទៀតរងរបួសដោយសារកងទ័ពអ៊ីស្រាអែល ចាប់តាំងពីបទឈប់បាញ់ចូលជាធរមាននៅតំបន់ហ្កាហ្សាស្ទ្រីប កាលថ្ងៃទី១០ ខែតុលា មក រួមទាំងការបំពានជាង ២០ដង ដែលបានកត់ត្រាក្នុងថ្ងៃអាទិត្យកន្លងទៅតែមួយប៉ុណ្ណោះ។

ការិយាល័យប្រព័ន្ធផ្សព្វផ្សាយរដ្ឋាភិបាលហ្កាហ្សា ដែលគ្រប់គ្រងដោយក្រុមហាម៉ាស បាននិយាយថា "អ៊ីស្រាអែលបានប្រព្រឹត្តការបំពានសរុប ៨០មកហើយ ចាប់តាំងពីការប្រកាសបទឈប់បាញ់ ដែលជាការរំលោភលើច្បាប់មនុស្សធម៌អន្តរជាតិ"។ អាជ្ញាធរនេះបន្តថា ការបំពាននោះរួមមាន ការបាញ់ប្រហារដោយផ្ទាល់លើជនស៊ីវិល ការបាញ់ផ្លោង ការកំណត់គោលដៅដោយចេតនា និងចាប់ខ្លួនជនស៊ីវិល។

រដ្ឋាភិបាលហ្កាហ្សានេះ និយាយថា កងទ័ពអ៊ីស្រាអែលជាអ្នកទទួលខុសត្រូវទាំងស្រុងចំពោះការរំលោភបំពាន និងអំពាវនាវឱ្យអង្គការសហប្រជាជាតិ និងអ្នកសម្របសម្រួល ជួយធ្វើអន្តរាគមន៍ជាបន្ទាន់។ ភាគីអ៊ីស្រាអែលបានចោទបកទៅវិញថា ក្រុមហាម៉ាសទេគឺជាអ្នកបំពាន ហើយខ្លួនត្រូវបង្ខំចិត្តឆ្លើយតបដើម្បីទប់ស្កាត់ស្ថានការណ៍។

គួរឱ្យដឹងថា កិច្ចព្រមព្រៀងឈប់បាញ់រវាងក្រុមប៉ាឡេស្ទីនហាម៉ាស និងអ៊ីស្រាអែល ផ្អែកលើផែនការដែលស្នើឡើងដោយលោកប្រធានាធិបតីអាមេរិក Donald Trump បានចូលជាធរមាននៅថ្ងៃទី១០ ខែតុលា។ បទឈប់បាញ់នេះបានបញ្ចប់សង្គ្រាម ២ឆ្នាំ ដែលសម្លាប់ជនជាតិប៉ាឡេស្ទីនជាង ៦៨.០០០នាក់ របួសប្រហែល ១៧ម៉ឺននាក់ និងបំផ្លាញហេដ្ឋារចនាសម្ព័ន្ធភាគច្រើនរបស់ហ្កាហ្សា៕