យោធាកូរ៉េខាងត្បូង បាននិយាយថា ទាហានកូរ៉េខាងជើងម្នាក់ បានរត់ភៀសខ្លួនចូលទៅកាន់កូរ៉េខាងត្បូង ដោយឆ្លងកាត់ព្រំដែនដែលមានកំពែងរឹងមាំ និងគ្រោះថ្នាក់ខ្លាំងរបស់គូប្រជែងទាំងពីរ កាលពីថ្ងៃអាទិត្យ (១៩ តុលា)។ នាយសេនាធិការចម្រុះរបស់កូរ៉េខាងត្បូង បាននិយាយក្នុងសេចក្តីថ្លែងការណ៍មួយថា យោធាបានចាប់ខ្លួនទាហានម្នាក់ដែលឆ្លងកាត់ផ្នែកកណ្តាលនៃព្រំដែនដីគោក ហើយទាហានរូបនេះបានបង្ហាញពីបំណងចង់តាំងទីលំនៅថ្មីនៅកូរ៉េខាងត្បូង។

ករណីនេះជាការរត់ចោលប្រទេសលើកដំបូងហើយដែលត្រូវរាយការណ៍ថាធ្វើឡើងដោយទាហានកូរ៉េខាងជើង ចាប់តាំងពីពលទាហានកូរ៉េខាងជើងម្នាក់រត់ទៅកូរ៉េខាងត្បូង តាមច្រកព្រំដែខាងកើតក្នុងខែសីហា ឆ្នាំ២០២៤។ បើទោះបីជាប្រទេសជិតខាងទាំងពីរនៅជាប់គ្នាក៏ដោយ ប៉ុន្តែមិនមែនជារឿងធម្មតាទេសម្រាប់ជនជាតិកូរ៉េខាងជើង ដែលរត់គេចខ្លួនតាមព្រំដែនគោកបែបនេះ។

មិនដូចឈ្មោះផ្លូវការរបស់ខ្លួនទេ តំបន់គ្មានយោធា (DMZ) — បណ្តោយ ២៤៨គីឡូម៉ែត្រ ទទឹង ៤គីឡូម៉ែត្រនេះ — ជាព្រំដែនធំទូលាយ ដែលត្រូវការពារយ៉ាងខ្លាំង ពោរពេញដោយគ្រាប់មីន អន្ទាក់រថក្រោះ របងលួសបន្លា និងទ័ពប្រយុទ្ធជាច្រើនយាមកាមនៅទីនោះ។ កាលឆ្នាំ២០១៧ ពេលដែលទាហានកូរ៉េខាងជើងគេចខ្លួនម្នាក់បានរត់ឆ្លងព្រំដែន ទាហានកូរ៉េខាងជើងបាញ់លើទាហាននោះអស់គ្រាប់ប្រហែល ៤០បង់ មុនពេលកូរ៉េខាងត្បូងអាចទាញទាហានដែលរងរបួស ទៅកាន់ទីសុវត្ថិភាព។

ភាគច្រើននៃជនជាតិកូរ៉េខាងជើងប្រហែល ៣៤.០០០នាក់ ដែលរត់គេចទៅកូរ៉េខាងត្បូង ចាប់តាំងពីចុងបញ្ចប់នៃសង្រ្គាមកូរ៉េឆ្នាំ១៩៥០-៥៣មក បានជ្រើសរើសរត់តាមរយៈប្រទេសចិន ដែលមានព្រំដែនមិនសូវគ្រោះថ្នាក់ និងវែងឆ្ងាយជាមួយកូរ៉េខាងជើង៕