រុស្ស៊ីបាននិយាយកាលពីថ្ងៃអាទិត្យថា កងកម្លាំងរបស់ខ្លួនបានដណ្តើមកាន់កាប់ទីតាំងលំនៅឋាន ចំនួនពីរកន្លែងបន្ថែមទៀតក្នុងតំបន់ Donetsk និង Zaporizhzhia រយៈពេល២៤ម៉ោងកន្លងទៅនេះ ខណៈអ៊ុយក្រែនបានអះអាងថាបានវាយប្រហារតម្រង់គោលដៅទៅលើហេដ្ឋារចនាសម្ព័ន្ធថាមពលរបស់រុស្ស៊ីដ៏សំខាន់។

យោងតាមក្រសួងការពារជាតិរុស្ស៊ីបានឲ្យដឹងថា ប្រព័ន្ធការពារដែនអាកាសរបស់ខ្លួនបានស្ទាក់ចាប់គ្រាប់រ៉ុក្កែត HIMARS ផលិតដោយសហរដ្ឋអាមេរិកចំនួន៣គ្រាប់ គ្រាប់បែកកំណត់គោលដៅពីលើអាកាសចំនួនពីរគ្រាប់ និងបានបាញ់ទម្លាក់យានដ្រូនចំនួន៣២៣គ្រឿងក្នុងអំឡុងពេលតែមួយ។ លើសពីនេះ កងកម្លាំងរុស្ស៊ីបានធ្វើការវាយប្រហារលើហេដ្ឋារចនាសម្ព័ន្ធដឹកជញ្ជូនរបស់អ៊ុយក្រែន និងទីតាំងប្រើប្រាស់សម្រាប់ដំឡើងយានដ្រូនរយៈចម្ងាយឆ្ងាយលទីក្រុងមូស្គូអះអាងថាគាំទ្រដល់ប្រតិបត្តិការយោធារបស់ទីក្រុងគីវ។

ទន្ទឹមនឹងនេះ នាយសេនាធិការនៃកងកម្លាំងប្រដាប់អាវុធអ៊ុយក្រែនបានរាយការណ៍នៅថ្ងៃតែមួយនោះថា កងកម្លាំងរបស់ខ្លួនបានធ្វើការវាយប្រហារស៊ីបគោលដៅលើទីតាំងសំខាន់ៗរបស់រុស្ស៊ី រួមមានរោងចក្រចម្រាញ់ប្រេង Novokuibyshevsk ក្នុងតំបន់Samara Oblast រោងចក្រឧស្ម័នOrenburg នៅតំបន់ Orenburg និងឃ្លាំងប្រេងឥន្ធនៈនិងប្រេងម៉ាស៊ីននៅទីក្រុង Berdyansk ជាទីក្រុងកំពង់ផែនៅភាគអាគ្នេយ៍ប្រទេសអ៊ុយក្រែន។ កងកម្លាំងអ៊ុយក្រែន បាននិយាយថា ប្រតិបត្តិការទាំងនេះគឺជាផ្នែកនៃយុទ្ធនាការកំពុងបន្តដើម្បីបង្អាក់ដល់សហគ្រាសដែលផ្គត់ផ្គង់ធនធានដល់យោធារុស្ស៊ី និងធ្វើឱ្យបាត់បង់សមត្ថភាពឧស្សាហកម្ម-យោធារបស់ទីក្រុងមូស្គូ។