អ៊ីរ៉ង់ និយាយថា ខ្លួនលែងមានចំណងផ្លូវច្បាប់ដោយការរឹតត្បិតលើកម្មវិធីនុយក្លេអ៊ែររបស់ខ្លួនទៀតហើយ ខណៈកិច្ចព្រមព្រៀងរយៈពេល១០ឆ្នាំរវាងអ៊ីរ៉ង់និងប្រទេសមហាអំណាចពិភពលោក បានផុតកំណត់ ទោះបីជាទីក្រុងតេអេរ៉ង់ បាននិយាយឡើងវិញនូវ «ការប្តេជ្ញាចិត្តចំពោះផ្នែកការទូត» ក៏ដោយ។

ក្រសួងការបរទេសអ៊ីរ៉ង់ បាននិយាយនៅក្នុងសេចក្តីថ្លែងការណ៍ថា «ចាប់ពីពេលនេះតទៅ រាល់បទប្បញ្ញត្តិនៃកិច្ចព្រមព្រៀងឆ្នាំ២០១៥ រួមទាំងការរឹតត្បិតលើកម្មវិធីនុយក្លេអ៊ែរអ៊ីរ៉ង់ និងយន្តការពាក់ព័ន្ធនានាត្រូវបានចាត់ទុកថាត្រូវបានបញ្ចប់»។

សេចក្តីថ្លែងកាណ៍និយាយថា «អ៊ីរ៉ង់បង្ហាញការប្តេជ្ញាចិត្តរបស់ខ្លួនយ៉ាងរឹងមាំចំពោះផ្នែកការទូត»។ «ថ្ងៃបញ្ចប់កិច្ចព្រមព្រៀង» ត្រូវបានកំណត់សម្រាប់រយៈពេល១០ឆ្នាំយ៉ាងពិតប្រាកដ បន្ទាប់ពីការអនុម័តសេចក្តីសម្រេចលេខ២២៣១ រក្សាទុកដោយក្រុមប្រឹក្សាសន្តិសុខអង្គការសហប្រជាជាតិ។

ដោយត្រូវបានគេស្គាល់ជាផ្លូវការថាជាផែនការសកម្មភាពគ្រប់ជ្រុងជ្រោយរួម (JCPOA) កិច្ចព្រមព្រៀងរវាងអ៊ីរ៉ង់ និងចិន បារាំង អាល្លឺម៉ង់ រុស្ស៊ី ចក្រភពអង់គ្លេស និងសហរដ្ឋអាមេរិក បានឃើញការដកទណ្ឌកម្មជាអន្តរជាតិប្រឆាំងអ៊ីរ៉ង់ជាថ្នូរនឹងការរឹតត្បិតលើកម្មវិធីនុយក្លេអ៊ែររបស់ប្រទេសនេះ។

ប៉ុន្តែទីក្រុងវ៉ាស៊ីនតោន បានដកខ្លួនចេញពីកិច្ចព្រមព្រៀងជាឯកតោភាគីក្នុងឆ្នាំ២០១៨ ក្នុងអំឡុងពេលអាណត្តិដំបូងរបស់លោកប្រធានាធិបតី Donald Trump ហើយទណ្ឌកម្មត្រូវបានដាក់ឡើងវិញ។ បន្ទាប់មកទីក្រុងតេអេរ៉ង់ បានចាប់ផ្តើមបង្កើនកម្មវិធីនុយក្លេអ៊ែររបស់ខ្លួន។ កិច្ចពិភាក្សាដើម្បីពិនិត្យឡើងវិញកិច្ចព្រមព្រៀង បានបរាជ័យរហូតមកដល់ពេលនេះ ហើយកាលពីក្នុងខែសីហា ចក្រភពអង់គ្លេស អាល្លឺម៉ង់ និងបារាំង បានជំរុញឱ្យមានដំណើរការដែលគេហៅថា «ត្រឡប់ទៅរកវិធានការដើម» ជាការនាំទៅដល់ការដាក់ទណ្ឌកម្មរបស់អង្គការសហប្រជាជាតិឡើងវិញ ។