លោកប្រធានាធិបតី Donald Trump បាននិយាយថា សហរដ្ឋអាមេរិក នឹង «មានភាពល្អប្រសើរ» ជាមួយប្រទេសចិន ដោយនេះជាការលើកឡើងដែលកើតមានបន្តិចនៅមុនពេលភាគីទាំង២ វិលទៅកាន់តុចរចា ហើយការផ្អាកជម្លោះពាណិជ្ជកម្មដ៏ផុយស្រួយ ជិតដល់កាលកំណត់។

ក្នុងអំឡុងពេលផ្ដល់បទសម្ភាសន៍ជាមួយប្រព័ន្ធផ្សព្វផ្សាយ Fox News កាលពីថ្ងៃអាទិត្យ (ទី១៩ ខែតុលា) នៅពេលត្រូវបានសួរអំពីការគំរាមរបស់លោក ក្នុងការដំឡើងអត្រាពន្ធ ១០០ភាគរយលើទំនិញចិន ដោយសារទីក្រុងប៉េកាំងប្ដេជ្ញាគ្រប់គ្រងយ៉ាងទូលំទូលាយលើរ៉ែកម្រ លោក Trump បានតបថា ការយកពន្ធនេះ គឺ «មិនមាននិរន្តរភាព» នោះទេ ទោះបីជា «វាអាចកើតមាន» ក៏ដោយ។

ជាមួយគ្នានេះ លោកបានបន្ថែមថា លោកមានទំនាក់ទំនងល្អជាមួយមេដឹកនាំចិន លោក Xi Jinping ហើយលោករំពឹងថា ការអង្គុយជជែកគ្នានឹងកើតឡើងនៅក្នុងប្រទេសកូរ៉េខាងត្បូង ជាកន្លែងដែលកិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ត្រូវចាប់ផ្តើមប្រព្រឹត្តទៅនៅចុងខែតុលានេះ។

លោក Trump បានសង្កត់ធ្ងន់ថា៖ «ខ្ញុំគិតថា យើងនឹងមានភាពល្អប្រសើរជាមួយប្រទេសចិន ប៉ុន្តែយើងត្រូវតែមានកិច្ចព្រមព្រៀងដ៏យុត្តិធម៌។ វាត្រូវតែមានភាពយុត្តិធម៌»។

គួរបញ្ជាក់ថា រដ្ឋមន្ត្រីក្រសួងរតនាគារ លោក Scott Bessent បាននិយាយថា សហរដ្ឋអាមេរិក និងចិន នឹងជួបពិភាក្សាគ្នា នៅចុងសប្តាហ៍នេះ ក្នុងប្រទេសម៉ាឡេស៊ី ដោយសម្ដីនោះបានកើតឡើងបន្ទាប់ពីលោកបានជួបជជែកគ្នាតាមប្រព័ន្ធអនឡាញ (វីដេអូខល) ជាមួយឧបនាយករដ្ឋមន្ត្រី លោក He Lifeng កាលពីថ្ងៃទី១៧ ខែតុលា ជាពិភាក្សាដែលប្រព័ន្ធផ្សព្វផ្សាយរដ្ឋចិន បានពិពណ៌នាថា ជាការផ្លាស់ប្តូរទស្សនៈក្នុងន័យស្ថាបនា៕