បេក្ខជនកណ្ដាលនិយម លោក Rodrigo Paz បានឈ្នះការបោះឆ្នោតប្រធានាធិបតីជុំទី២ របស់បូលីវី កាលពីថ្ងៃអាទិត្យ (ទី១៧ ខែតុលា) ដោយបានយកឈ្នះគូប្រជែងខាងអភិរក្សនិយម លោក Jorge Tuto Quiroga ខណៈដែលវិបត្តិសេដ្ឋកិច្ចដ៏អាក្រក់បំផុតរបស់ប្រទេស ក្នុងមួយជំនាន់មួយ បានជួយជំរុញឲ្យមានការបញ្ចប់នូវការគ្រប់គ្រងរបស់ក្រុមឆ្វេងនិយម ដែលមានរយៈពេលជិត ២ទសវត្សរ៍។

បើយោងតាមលទ្ធផលដំបូងពីស្ថាប័នបោះឆ្នោតរបស់ប្រទេសបូលីវី បានបង្ហាញថា លោក Paz សមាជិកព្រឹទ្ធសភាពីគណបក្ស Christian Democratic (PDC) (ប្រជាធិបតេយ្យគ្រិស្ត) ឈ្នះបាសំឡេងឆ្នោត ៥៤,៥ភាគរយ ដោយលើលោក Quiroga ដែលមាន ៤៥,៥ភាករយ។ ប៉ុន្តែគណបក្សរបស់លោក Paz មិនក្ដោបសំឡេងភាគច្រើននៅក្នុងសភារបស់ប្រទេស ជាអ្វីដែលនឹងជំរុញឲ្យលោកត្រូវបង្កើតសម្ព័ន្ធភាព ដើម្បីគ្រប់គ្រងប្រទេសប្រកបដោយប្រសិទ្ធភាព។ ប្រធានាធិបតីថ្មីត្រូវចូលកាន់តំណែង នៅថ្ងៃទី៨ ខែវិច្ឆិកា។

ក្នុងអំឡុងពេលមានសុន្ទរកថាជ័យជម្នះរបស់លោកពីទីក្រុង La Paz បន្ទាប់ពីលោក Quiroga បានទទួលស្គាល់ការបរាជ័យ លោក Paz បាននិយាយថា៖ «យើងត្រូវតែបើកប្រទេសបូលីវីទៅកាន់ពិភពលោក»។

ជ័យជម្នះរបស់សមាជិកព្រឹទ្ធសភាវ័យ ៥៨ឆ្នាំរូបនេះ គឺជាការផ្លាស់ប្តូរជាប្រវត្តិសាស្ត្រមួយ សម្រាប់ប្រទេសនៅតំបន់អាមេរិកខាងត្បូងមួយ ដែលស្ទើរតែត្រូវបានគ្រប់គ្រងជាបន្តបន្ទាប់ ចាប់តាំងពីឆ្នាំ២០០៦ មក ដោយគណបក្ស Movement To Socialism ឬ MAS របស់បូលីវី ដែលធ្លាប់ទទួលបានការគាំទ្រយ៉ាងច្រើនលើសលប់ពីជនជាតិដើមភាគតិចរបស់ប្រទេសនេះ៕