អង្គការឧតុនិយមពិភពលោក (WMO) បានជំរុញឲ្យចាត់វិធានការបិទភាពឆកល្វែង នៅក្នុងប្រព័ន្ធឃ្លាំមើលពិភពលោក ដែលមានគោលបំណងការពារមនុស្សពីអាកាសធាតុអាក្រក់ធ្ងន់ធ្ងរខ្លាំង ដោយបានបញ្ជាក់នៅថ្ងៃចន្ទ (ទី២០ ខែតុលា) នេះថា ការព្រមានជាមុនបែបនេះ គឺចាំបាច់ជាពិសេស នៅក្នុងប្រទេសកំពុងអភិវឌ្ឍន៍។

ដោយបានរៀបចំកិច្ចប្រជុំពិសេស នៅទីក្រុងហ្សឺណែវ ប្រទេសស្វីស WMO បានលើកឡើងថា ក្នុងរយៈពេល ៥ទសវត្សរ៍កន្លងមកនេះ គ្រោះថ្នាក់ទាក់ទងនឹងអាកាសធាតុ ទឹក និងបម្រែបបម្រួលអាកាសធាតុ បានបណ្ដាលឲ្យមនុស្សជាង ២លាននាក់បាត់បង់ជីវិត ដោយ ៩០ភាគរយនៃការស្លាប់ទាំងនោះ កើតឡើងនៅក្នុងប្រទេសកំពុងអភិវឌ្ឍន៍។

ទិន្នន័យពីទីភ្នាក់ងារអាកាសធាតុរបស់អង្គការសហប្រជាជាតិ (UN) មួយនេះ បង្ហាញថា អគ្គលេខាធិការ WMO លោកស្រី Celeste Saulo បានធ្វើឲ្យការជំរុញដល់ប្រព័ន្ធព្រមានជាមុនជាអាទិភាពមួយ ប៉ុន្តែនៅតែមានប្រទេសតែ ៥៥ភាគរយដែលបានលើកកម្ពស់សមត្ថភាពឃ្លាំមើលនេះ។

WMO បានឲ្យដឹងនៅក្នុងសេចក្តីថ្លែងការណ៍មួយថា៖ «មនុស្សរាប់លាននាក់ខ្វះការការពារប្រឆាំងនឹងអាកាសធាតុដ៏គ្រោះថ្នាក់ ដែលកំពុងធ្វើឲ្យធនធានសេដ្ឋកិច្ច និងហេដ្ឋារចនាសម្ព័ន្ធសំខាន់ៗខូចខាតយ៉ាងធ្ងន់ធ្ងរ។

គួរបញ្ជាក់ថា ចំនួនប្រទេសដែលប្រើប្រព័ន្ធព្រមានជាមុន បានកើនឡើងទ្វេដង ក្នុងរយៈពេល ៣ឆ្នាំ ដោយមានដល់ ១១៩ប្រទេស ប៉ុន្តែការវាយតម្លៃរបស់ WMO លើប្រទេសចំនួន ៦២ បានបង្ហាញថា ពាក់កណ្តាលនៃប្រទេសទាំងនោះមានត្រឹមសមត្ថភាពតាមដានមូលដ្ឋានប៉ុណ្ណោះ ហើយ ១៦ភាគរយ មានតិចជាងសមត្ថភាពមូលដ្ឋាន៕