ប្រធានាធិបតីអ៊ុយក្រែន លោក Volodymyr Zelenskyy បានបញ្ជាក់ថា លោកនឹងត្រៀមខ្លួនជាស្រេច ដើម្បីចូលរួមជាមួយប្រធានាធិបតីរុស្ស៊ី លោក Vladimir Putin និងសមភាគីសហរដ្ឋអាមេរិក លោក Donald Trump ក្នុងកិច្ចប្រជុំកំពូលរបស់មេដឹកនាំទាំង២ នៅប្រទេសហុងគ្រី ប្រសិនបើលោកត្រូវបានអញ្ជើញ។

លោក Trump និងលោក Putin បានឲ្យដឹងថា ពួកលោកនឹងជួបប្រជុំគ្នា នៅរដ្ឋធានីរបស់ហុងគ្រី ប្រហែលជាក្នុងរង្វង់ប៉ុន្មានសប្តាហ៍ទៀត ខណៈដែលមេដឹកនាំអាមេរិក នៅតែបន្តប្រឹងប្រែងសម្របសម្រួល ក្នុងគោលបំណងឲ្យមានកិច្ចព្រមព្រៀងសន្តិភាព ដើម្បីបញ្ចប់សង្រ្គាមរយៈពេល ៣ឆ្នាំកន្លះដែលបង្កឡើងដោយការឈ្លានពានរបស់រុស្ស៊ី នៅឆ្នាំ២០២២។

ក្នុងការកត់សម្គាល់ ដែលត្រូវបានចេញផ្សាយនៅថ្ងៃចន្ទ (ទី២០ ខែតុលា) នេះ លោក Zelenskyy បានប្រាប់អ្នកសារព័ត៌មានថា៖ «ប្រសិនបើខ្ញុំត្រូវបានអញ្ជើញឲ្យទៅទីក្រុង Budapest ពោលគឺប្រសិនបើវាជាការអញ្ជើញក្នុងទម្រង់មួយ ដែលយើងត្រូវជួបប្រជុំ ៣ភាគី ឬតាមរយៈអ្វីដែលត្រូវបានហៅថា កិច្ចការទូតត្រល់ (ការចចារដែលសម្រុះសម្រួលដោយអន្តរការី) នោះគឺ លោកប្រធានាធិបតី Trump ជួបជាមួយលោក Putin ហើយបន្ទាប់មកលោកប្រធានាធិបតី Trump ជួបជាមួយខ្ញុំ។ បន្ទាប់មកនៅក្នុងទម្រង់ណាមួយ ឬផ្សេងទៀត យើងនឹងយល់ព្រម»។

ប្រធានាធិបតីអ៊ុយក្រែនបានរិះគន់ការជ្រើសរើសប្រទេសហុងគ្រី ដែលមានទំនាក់ទំនងយ៉ាងសោះកក្រោះ ជាមួយទីក្រុងគីវ ហើយត្រូវបានគេមើលឃើញថា ជាសមាជិកដែលមាននិន្នាការគាំទ្រវិមានក្រឹមឡាំងបំផុត នៅសហភាពអឺរ៉ុប។

តែយ៉ាងណាក្ដី ទីក្រុងគីវ បានបញ្ជាក់ថា ខ្លួនបានត្រៀមខ្លួនជាស្រេច ដើម្បីចូលរួមកិច្ចប្រជុំ ៣ភាគី រវាងលោក Zelenskyy លោក Putin និងលោក Trump ក្នុងប្រទេសអព្យាក្រឹតមួយចំនួន រួមមានទួរគី ស្វីស និងបុរីវ៉ាទីកង់៕