នៅថ្ងៃចន្ទ (ទី២០ ខែតុលា) នេះ វិមានក្រឹមឡាំង បានបញ្ជាក់ឲ្យដឹងថា ប្រទេសរុស្ស៊ីបានត្រៀមខ្លួនពង្រីកកិច្ចសហប្រតិបត្តិការជាមួយអ៊ីរ៉ង់លើគ្រប់វិស័យ។

ទីក្រុងមូស្គូមានទំនាក់ទំនងជិតស្និទ្ធជាមួយទីក្រុងតេអេរ៉ង់ ហើយបានថ្កោលទោសការវាយប្រហាររបស់សហរដ្ឋអាមេរិក និងអ៊ីស្រាអែល លើទីតាំងនុយក្លេអ៊ែរអ៊ីរ៉ង់ កាលពីដើមឆ្នាំនេះ ជាអ្វីដែលត្រូវបានឡើងក្នុងគោលបំណងរារាំងទីក្រុងតេអេរ៉ង់កុំឲ្យទទួលបានគ្រាប់បែកនុយក្លេអ៊ែរ។ អ៊ីរ៉ង់បដិសេធមិនបានព្យាយាមផលិតអាវុធនុយក្លេអ៊ែរឡើយ។

នៅពេលត្រូវបានសួរដោយអ្នកសារព័ត៌មាន អំពីថា តើរុស្ស៊ីមើលឃើញការវិវត្តនៃព្រឹត្តិការណ៍នានា ជុំវិញកម្មវិធីនុយក្លេអ៊ែររបស់អ៊ីរ៉ង់យ៉ាងដូចម្ដេច និងថា តើទីក្រុងមូស្គូនឹងធ្វើឲ្យទំនាក់ទំនងកាន់តែស៊ីជម្រៅជាមួយទីក្រុងតេអេរ៉ង់ដែរ ឬយ៉ាងណា អ្នកនាំពាក្យវិមានក្រឹមឡាំង លោក Dmitry Peskov បានឆ្លើយថា៖ «រុស្ស៊ីពិតជាត្រៀមខ្លួនជាស្រេច ដើម្បីពង្រីកកិច្ចសហប្រតិបត្តិការជាមួយអ៊ីរ៉ង់ លើគ្រប់វិស័យ។ អ៊ីរ៉ង់គឺជាដៃគូរបស់យើង ហើយទំនាក់ទំនងរបស់យើង កំពុងវិវត្តយ៉ាងខ្លាំងក្លា»។

ជាមួយគ្នានេះ លោក Peskov បានបញ្ជាក់ថា បណ្តាប្រទេសអ៊ឺរ៉ុប កំពុងដាក់ «សម្ពាធលើសលប់» លើអ៊ីរ៉ង់ ទាក់ទងនឹងការចរចាលើកម្មវិធីនុយក្លេអ៊ែររបស់ខ្លួន ដោយលោកបានបន្ថែមថា ស្ថានភាព គឺ «ស្មុគស្មាញខ្លាំងណាស់»។

បេសកជនរបស់ប្រធានាធិបតីរុស្ស៊ី លោក Vladimir Putin គ្រោងនឹងជួបជាមួយអគ្គលេខាធិការក្រុមប្រឹក្សាសន្តិសុខជាតិជាន់ខ្ពស់របស់អ៊ីរ៉ង់ លោក Ali Larijani នៅថ្ងៃចន្ទនេះ ពោលគឺមិនដល់មួយសប្តាហ៍បន្ទាប់ពីលោក Larijani បានជួបជាមួយមេដឹកនាំវិមានក្រឹមឡាំង និងបានប្រាប់ពីសាររបស់មេដឹកនាំកំពូលអ៊ីរ៉ង់ លោក Ayatollah Ali Khamenei៕