អ្នកបើកបររថយន្តធំដែលបានជាប់ខ្លួនអស់រយៈពេលជាច្រើនថ្ងៃមកហើយនៅច្រកព្រំដែន Torkham រវាងប៉ាគីស្ថាន និងអាហ្វហ្គានីស្ថាន និយាយនៅថ្ងៃចន្ទនេះថា ពួកគេសង្ឃឹមថា ច្រកព្រំដែននឹងបើកទ្វារឡើងវិញក្នុងពេលឆាប់ៗនេះ ក្រោយអាហ្វហ្គានីស្ថានយល់ព្រមបទឈប់បាញ់បន្ទាន់ បន្ទាប់ពីកិច្ចប្រជុំសន្តិភាពនៅទីក្រុងដូហា ប្រទេសកាតា ។

អ្នកបើករថយន្តធំនិយាយថា ពួកគេអស់ប្រាក់ចាយហើយ គ្មានបន្លែ ផ្លែឈើ ហើយទំនិញផ្សេងៗទៀតខូចអស់ ពួកគេប្រឈមការលំបាកក្នុងការស្វែងរកអាហារពេលដែលពួកគេនៅជាប់ខ្លួនបែបនេះ ។

កាលពីថ្ងៃសៅរ៍កន្លងទៅ ក្រុមមន្រ្តីអាហ្វហ្គានីស្ថាននិយាយថា ប៉ាគីស្ថាន បានបើកការវាយប្រហារតាមច្រកអាកាសនៅក្នុងទឹកដីអាហ្វហ្គានីស្ថាន ដោយបានសម្លាប់មនុស្សយ៉ាងហោច ១០នាក់ ហើយនិងបំពានបទឈប់បាញដែលនាំឲ្យកើតមានភាពស្ងប់ស្ងាត់រយៈពេល ២ថ្ងៃនៅតាមព្រំដែន ក្រោយការបង្ហូរឈាមគ្នាដ៏ខ្លាំងក្លារួចមកនោះ ។

ចាប់តាំងពីថ្ងៃទី ១២ ខែតុលារហូតមក ប៉ាគីស្ថានបានបិទច្រកឆ្លងកាត់ព្រំដែនជាច្រើនកន្លែងនៅតាមបណ្តោយព្រំដែនប្រវែង ២.៦០០គ.មជាមួយអាហ្វហ្គានីស្ថាន បន្ទាប់ពីការកើនឡើងភាពតានតឹង ជាហេតុធ្វើឲ្យបញ្ឈប់ពាណិជ្ជកម្មរវាងប្រទេសជិតខាងទាំង ២ និងបណ្តាលឲ្យរថយន្តដឹកទំនិញរាប់សិបគ្រឿងជាប់នៅតាមព្រំដែនភាគីប្រទេសទាំង ២ ៕