មេដឹកនាំកំពូលអ៊ីរ៉ង់ លោក Ayatollah Ali Khamenei នៅថ្ងៃចន្ទ (ទី២០ ខែតុលា) នេះ បានច្រានចោលសំណើឲ្យមានកិច្ចចរចាជាថ្មីពីប្រធានាធិបតីអាមេរិក លោក Donald Trump ហើយបានបដិសេធការអះអាងរបស់លោក ដែលថា សហរដ្ឋអាមេរិកបានបំផ្លាញសមត្ថភាពនុយក្លេអ៊ែររបស់អ៊ីរ៉ង់។

ទីក្រុងតេអេរ៉ង់ និងទីក្រុងវ៉ាស៊ីនតោន បានចូលរួមក្នុងការចរចានុយក្លេអ៊ែរដោយប្រយោលចំនួន ៥ជុំ ដែលបានបញ្ចប់ដោយសារសង្គ្រាមតាមអាកាសរយៈពេល ១២ថ្ងៃ កាលពីខែមិថុនា ដែលអ៊ីស្រាអែល និងសហរដ្ឋអាមេរិក បានទម្លាក់គ្រាប់បែកលើទីតាំងនុយក្លេអ៊ែររបស់អ៊ីរ៉ង់។

លោក Khamenei បាននិយាយតាមប្រព័ន្ធផ្សព្វផ្សាយរដ្ឋថា៖ «លោក Trump និយាយថា លោកគឺជាអ្នកធ្វើកិច្ចព្រមព្រៀង ប៉ុន្តែប្រសិនបើកិច្ចព្រមព្រៀងមួយ ត្រូវបានកើតឡើងអមដោយការសម្លុតកំហែង ហើយលទ្ធផលរបស់វាត្រូវបានកំណត់ទុកជាមុនរួចហើយនោះ វាមិនមែនជាកិច្ចព្រមព្រៀងទេ ប៉ុន្តែជាការដាក់ទណ្ឌកម្ម និងការគំរាមកំហែង»។

គួរដឹងថា កាលពីសប្តាហ៍មុន លោក Trump បានប្រាប់សភាអ៊ីស្រាអែលថា វាពិតជាអស្ចារ្យណាស់ ប្រសិនបើទីក្រុងវ៉ាស៊ីនតោន អាចចរចាឲ្យមាន «កិច្ចព្រមព្រៀងសន្តិភាព» ជាមួយទីក្រុងតេអេរ៉ង់ ដោយនោះបានកើតឡើងបន្ទាប់ពីមាននូវការចាប់ផ្តើមបទឈប់បាញ់ នៅតំបន់ហ្កាហ្សា រវាងអ៊ីស្រាអែល និងក្រុមសកម្មប្រយុទ្ធហាម៉ាសប៉ាឡេស្ទីន។

លោក Khamenei បានប្រាប់បន្ថែមថា៖ «ប្រធានាធិបតីអាមេរិកនិយាយដោយមោទនភាពថា ពួកគេបានទម្លាក់គ្រាប់បែក និងបំផ្លាញឧស្សាហកម្មនុយក្លេអ៊ែររបស់អ៊ីរ៉ង់។ ល្អណាស់ សូមបន្តសុបិននេះចុះ!។ តើវាពាក់ព័ន្ធអ្វីជាមួយអាមេរិក ថា តើអ៊ីរ៉ង់មានទីកន្លែងផលិតអាវុធនុយក្លេអ៊ែរដែរ ឬទេ? អន្តរាគមន៍ទាំងនេះ មិនសមរម្យ ខុសឆ្គង និងពេញទៅដោយការសម្លុតកំហែង»។

មហាអំណាចលោកខាងលិច បានចោទប្រកាន់អ៊ីរ៉ង់ថា កំពុងព្យាយាមផលិតគ្រាប់បែកនុយក្លេអ៊ែរ តាមរយៈការបង្កើនសារធាតុអ៊ុយរ៉ានីញ៉ូម ហើយចង់ឲ្យប្រទេសនេះបញ្ឈប់សកម្មភាពបែបនេះ។ ទីក្រុងតេអេរ៉ង់បដិសេធមិនបានស្វែងរកការចម្រាញ់សារធាតុផលិតអាវុធឡើយ ដោយអះអាងថា កម្មវិធីនេះមានគោលបំណងផលិតថាមពលស៊ីវិលតែម៉្យាងប៉ុណ្ណោះ៕