បាល់ទាត់៖ មន្ទីរអប់រំ យុវជន និងកីឡាខេត្តកណ្ដាលបានប្រកាសការប្រកួតបាល់ទាត់យុវជនអាយុក្រោម ១៥ឆ្នាំជ្រើសរើសជើងឯកថ្នាក់ខេត្តប្រចាំឆ្នាំ២០២២ ដែលគ្រោងនឹងចាប់ផ្ដើមការប្រកួតនាថ្ងៃទី០៩ ខែកុម្ភៈស្អែកនេះនៅកីឡដ្ឋានខេត្តកណ្ដាល។ លោក ពៅ វណ្ណា ប្រធានការិយាល័យអប់រំកាយ និងកីឡាបានថ្លែងក្នុងកិច្ចប្រជុំបច្ចេកទេស និងពិធីចាប់ឆ្នោតប្រកួតកាលពីថ្ងៃទី០៧ ខែកុម្ភៈថា ជើងឯក U15 ថ្នាក់ខេត្តឆ្នាំនេះមាន ៩ក្រុមចូលរួមដែលនឹងធ្វើការប្រកួតពីថ្ងៃទី០៩ រហូតដល់ថ្ងៃទី១៦ ខែកុម្ភៈ ឆ្នាំ២០២២ ខាងមុខដោយប្រើរូបមន្ដប្រកួតចាញ់ធ្លាក់។
លោកបន្ដថា គោលបំណងនៃការរៀបចំពានរង្វាន់យុវជននេះ គឺដើម្បីបំផុសស្មារតីយុវជនឲ្យស្រលាញ់ និងចូលរួមលេងកីឡាដើម្បីទទួលបានសុខភាពល្អ កាយសម្បទារឹងមាំ និងពង្រឹងបញ្ញាស្មារតីក្នុងការសិក្សា ពិសេសស្របតាមអនុសាសន៍របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាដែលមានប្រសាសន៍ថា «ប្រជាពលរដ្ឋម្នាក់ ត្រូវលេងកីឡាមួយមុខ»។ តាមរយៈនេះលោកបានជំរុញឲ្យកីឡាករ និងក្រុមចូលរួមទាំងអស់ត្រូវខិតខំប្រកួតប្រជែងឲ្យអស់ពីសមត្ថភាព និងបច្ចេកទេសដើម្បីសម្រេចបាននូវលទ្ធផលល្អប្រសើរមួយដោយឈរលើស្មារតីមិត្តភាព សាមគ្គីភាព ចៀសវាងបញ្ហារបួស និងហិង្សាផ្សេងៗនៅលើទីលាន ហើយជំរុញវិស័យកីឡាក្នុងខេត្តកណ្ដាលឲ្យកាន់តែរីកចម្រើនបន្ថែមទៀត ដើម្បីឈានទៅការប្រកួតថ្នាក់ជាតិនាថ្ងៃអនាគត។
ចំពោះលទ្ធផលនៃការចាប់ឆ្នោតប្រកួតរវាងបេក្ខភាពចូលរួមទាំង ៩ក្រុមរួមមានក្រុមកសិដ្ឋានអមរៈជួបក្រុមស្អាងយើងស្អាត, ក្រុមសាលាតម្រង់ទិសបាល់ទាត់ U15 ខេត្ដកណ្ដាលជួបក្រុមរដ្ឋបាលឃុំកំពង់ស្វាយ, ក្រុមវិទ្យាល័យជ័យវរន្ម័នទី៧ ជួបក្រុមស្ដេចគ្រុឌ និងក្រុមយុវជនភូមិស្ទឹងជ្រៅជួបក្រុមយុវជនស្ម័គ្រចិត្តស្រុកកណ្ដាលស្ទឹង។ រីឯ ១ក្រុមទៀតគឺក្រុមហនុមានស្វាយរលំត្រូវបានចាប់ឆ្នោតឈរចាំនៅវគ្គបន្ដ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
