ភាគីទាំងពីរបាននិយាយថា ប្រមុខការទូតជាន់ខ្ពស់រុស្ស៊ីលោក Sergei Lavrov និងសមភាគីអាមេរិក លោក Marco Rubio បានពិភាក្សាអំពីការត្រៀមរៀបចំសម្រាប់កិច្ចប្រជុំកំពូលនាពេលខាងមុខរវាងលោក Vladimir Putin និងលោក Donald Trump នៅក្នុងការសន្ទនាតាមទូរស័ព្ទកាលពីថ្ងៃចន្ទ។

អ្នកនាំពាក្យរងលោកTommy Pigott បាននិយាយក្នុងសេចក្តីថ្លែងការណ៍មួយថាលោកRubio បានសង្កត់ធ្ងន់លើសារៈសំខាន់នៃការចូលរួមនាពេលខាងមុខ ដែលជាឱកាសមួយសម្រាប់ទីក្រុងមូស្គូ និងទីក្រុងវ៉ាស៊ីនតោន សហការលើការជំរុញដំណោះស្រាយយូរអង្វែងនៃសង្រ្គាមរុស្ស៊ី-អ៊ុយក្រែន។

ប្រធានាធិបតីអ៊ុយក្រែន លោក Volodymyr Zelenskyy បាននិយាយថ្មីៗនេះថា លោកបានត្រៀមខ្លួនរួចជាស្រេចដើម្បីចូលរួម ប្រសិនបើមានការអញ្ជើញ ប៉ុន្តែទាំងទីក្រុងមូស្គូ ទាំងវ៉ាស៊ីនតោន ពុំបានលើកឡើងពីលោក Zelenskyy នៅក្នុងសេចក្តីថ្លែងការណ៍របស់ពួកគេនោះទេ។

វិមានក្រឹមឡាំង បាននិយាយមុននេះថាខ្លួនមិនមានព័ត៌មានលម្អិតអំពីថាតើលោក Zelenskyy នឹងចូលរួមដែរឬយ៉ាងណានោះទេ។

កិច្ចខិតខំប្រឹងប្រែងការទូតដើម្បីបញ្ចប់ការឈ្លានពានរបស់រុស្ស៊ីរយៈពេល៣ឆ្នាំកន្លះមកនេះ បានជាប់គាំងចាប់តាំងពីលោក Trump និងលោក Putin បានជួបប្រជុំគ្នាសម្រាប់កិច្ចចរចាសន្តិភាពនៅរដ្ឋអាឡាស្កាក្នុងខែសីហា។

មេដឹកនាំអាមេរិក និងរុស្ស៊ី បានប្រកាសកាលពីសប្តាហ៍មុនថាលោកទាំងពីរ នឹងជួបគ្នានៅទីក្រុង Budapest ប្រទេស ហុងគ្រី សម្រាប់កិច្ចចរចាជុំទីពីរ ប៉ុន្តែគេមិនច្បាស់ថាតើមេដឹកនាំអ៊ុយក្រែន ដែលមិនត្រូវបានអនុញ្ញាតឲ្យចូលរួមកិច្ចប្រជុំកន្លងមក នឹងចូលរួមដែរឬអត់នោះទេ៕