ប្រធានាធិបតីបារាំង លោក Emmanuel Macron បាននិយាយកាលពីថ្ងៃចន្ទ (២០ តុលា) ថា លោកប្រធានាធិបតីអ៊ុយក្រែន Volodymyr Zelenskyy នឹងទៅចូលរួមកិច្ចប្រជុំនៃសម្ព័ន្ធមិត្តរបស់អ៊ុយក្រែន ដែលត្រូវគេស្គាល់ថាជា "សម្ព័ន្ធនៃឆន្ទៈ" ក្នុងទីក្រុងឡុងដ្រ៍ របស់ចក្រភពអង់គ្លេស នៅថ្ងៃសុក្រ ទី២៤ ខែតុលា សប្ដាហ៍នេះ ខណៈទីក្រុងគីវ ព្យាយាមកៀងគរការគាំទ្រក្នុងសង្រ្គាមរបស់ខ្លួនប្រឆាំងនឹងរុស្ស៊ី។

ថ្លែងទៅកាន់អ្នកកាសែតនៅប្រទេសស្លូវេនី លោក Macron បាននិយាយថា "ថ្ងៃសុក្រនេះ សម្ព័ន្ធមិត្តនឹងមានកិច្ចប្រជុំរបស់ក្រុមចម្រុះនៃឆន្ទៈ - ទាំងតាមអនឡាញ និងដោយផ្ទាល់ - នៅក្នុងទីក្រុងឡុងដ្រ៍ ហើយលោកប្រធានាធិបតី Zelenskiy ក៏នឹងនៅទីនោះផងដែរ"។

ក្រុមដែលគេហៅថា “សម្ព័ន្ធនៃឆន្ទៈ” ដែលបានបង្កើតឡើងរួមគ្នាដោយបារាំង និងអង់គ្លេសកាលពីខែកុម្ភៈ បានជួបពិភាក្សាជាច្រើនខែក្នុងកម្រិតផ្សេងៗ ដើម្បីព្យាយាមកំណត់ផែនការសម្រាប់វិធីសាស្រ្តដែលពួកគេអាចរួមចំណែកបានផ្នែកយោធាសម្រាប់ទីក្រុងគីវ ហើយដើម្បីរារាំងរុស្ស៊ី ពីការវាយប្រហារអ៊ុយក្រែនម្តងទៀត នៅពេលមានបទឈប់បាញ់ចុងក្រោយ។

កាលពីថ្ងៃចន្ទកន្លងទៅ លោក Zelenskyy បានហៅកិច្ចប្រជុំរបស់លោកកាលពីសប្តាហ៍មុនជាមួយលោកប្រធានាធិបតី Donald Trump ថាជាជោគជ័យណាស់ ដែលបានផ្តល់នូវវឌ្ឍនភាពក្នុងការទទួលបានប្រព័ន្ធការពារដែនអាកាសថ្មី ប៉ុន្តែកាងអះអាងនេះបានផ្ទុយពីរបាយការណ៍ប្រព័ន្ធផ្សព្វផ្សាយ ដែលនិយាយថា លោក Trump បានប្រើពាក្យធ្ងន់ៗ នៅក្នុងជំនួបសេតវិមានដ៏តានតឹងមួយ៕