រដ្ឋមន្ត្រីការពារជាតិប្រទេសប៉ាគីស្ថាន លោក Khawaja Muhammad Asif បាននិយាយថា កិច្ចព្រមព្រៀងបទឈប់បាញ់ដ៏ផុយស្រួយរបស់ប្រទេសលោកជាមួយអាហ្វហ្គានីស្ថាន អាស្រ័យលើថាតើទីក្រុងកាប៊ុលទប់ស្កាត់ក្រុមប្រដាប់អាវុធដែលវាយប្រហារឆ្លងព្រំដែនរួមគ្នា បានក្នុងកម្រិតណា។

លោក Asif បាននិយាយនៅក្នុងបទសម្ភាសន៍មួយជាមួយទីភ្នាក់ងារសារព័ត៌មាន Reuters កាលពីថ្ងៃចន្ទថា «អ្វីគ្រប់យ៉ាង គឺស្ថិតនៅលើការសន្យា» បន្ទាប់ពីប្រទេសទាំងពីរបានឈានដល់កិច្ចព្រមព្រៀងបទឈប់បាញ់ដែលសម្របសម្រួលដោយប្រទេសកាតា និងប្រទេសទួរគី កាលពីថ្ងៃមុន។

បទឈប់បាញ់ បានធ្វើឡើងបន្ទាប់ពីមួយសប្តាហ៍នៃការប៉ះទង្គិចគ្នានៅតាមព្រំដែនដែលធ្វើអោយទំនាក់ទំនងធ្លាក់ចុះដល់ចំណុចទាបបំផុតចាប់តាំងពីក្រុមតាលីបង់នៅអាហ្វហ្គានីស្ថានបានវិលត្រឡប់ទៅកាន់អំណាចវិញក្រោយការចាកចេញរបស់ទាហានអាមេរិកនិងសម្ព័ន្ធយោធាណាតូចេញពីប្រទេសនេះក្នុងឆ្នាំ២០២១។

ការប្រយុទ្ធគ្នា ត្រូវបានបង្កឡើងបន្ទាប់ពីទីក្រុង Islamabad ទាមទារឲ្យទីក្រុង Kabul គ្រប់គ្រងអ្នកប្រយុទ្ធមកពីក្រុមតាលីបង់ប៉ាគីស្ថាន Tehreek-e-Taliban Pakistan (TTP) ជាឆ័ត្រនៃក្រុមប្រដាប់អាវុធជាច្រើនដែលគេស្គាល់ជាទូទៅថាប៉ាគីស្ថានតាលីបង់ ដោយនិយាយថាពួកគេធ្វើប្រតិបត្តិការចេញពីទីជម្រកនៅក្នុងប្រទេសអាហ្វហ្គានីស្ថាន។

រដ្ឋមន្ត្រីបាននិយាយថាក្រុមតាលីបង់ប៉ាគីស្ថាន Tehreek-e-Taliban Pakistan (TTP) បានធ្វើប្រតិបត្តិការ «នៅក្នុងការសមគំនិតគ្នា» ជាមួយក្រុមតាលីបង់ដែលកំពុងកាន់អំណាចនៅប្រទេសអាហ្វហ្គានីស្ថាន ជាការចោទប្រកាន់ដែលក្រោយមកបានច្រានចោល។ អាហ្វហ្គានីស្ថាន បានចោទប្រកាន់យោធាប៉ាគីស្ថាន ថាបានផ្សព្វផ្សាយព័ត៌មានមិនពិត និងផ្តល់ទីជម្រកដល់ក្រុមអ្នកប្រយុទ្ធមានទំនាក់ទំនងជាមួយក្រុមអាយស៊ីស(ISIS) ដើម្បីបំផ្លាញស្ថិរភាព និងអធិបតេយ្យភាពរបស់ខ្លួន។