ក្រុមហ៊ុនការពារជាតិរបស់ប្រទេសបារាំង KNDS និងសមាជិកនៃកងកម្លាំងប្រដាប់អាវុធបារាំង កាលពីថ្ងៃចន្ទ ទី២០ ខែតុលា បានបង្ហាញនូវប្រព័ន្ធច្រើនប្រភេទនៅឯមូលដ្ឋានយោធាមួយកន្លែងនៅភាគខាងត្បូងប្រទេសបារាំង រួមមានកាំភ្លើងធំស្វ័យកម្មសេសា(CAESAR) ដែលមានលក្ខណៈទំនើបប្លែកពីគេនៅក្នុងប្រទេសអ៊ុយក្រែន។

កាំភ្លើងធំស្វ័យកម្មCAESAR និងទាហានកាំភ្លើងត្បាល់ បានបាញ់គ្រាប់ពិតជាច្រើនជុំ ខណៈឧទ្ធម្ភាគចក្រ និងអង្គភាពប្រឆាំងយានដ្រូនត្រូវបានដាក់ពង្រាយ នៅក្នុងការបង្ហាញដល់គណៈប្រតិភូយោធាមកពីបណ្តាប្រទេសនានានៅអឺរ៉ុប មជ្ឈិមបូព៌ា និងនៅអាស៊ីអាគ្នេយ៍។

លោក Olivier Fort បាននិយាយថា «ចំណាប់អារម្មណ៍លើកាំភ្លើងធំស្វ័យកម្ម CAESAR បានកើនឡើងច្រើន ដោយអ្នកសង្កេតការណ៍ជាច្រើនបានកត់សម្គាល់ឃើញថា វាមានល្បីល្បាញនៅអ៊ុយក្រែន ខណៈការជួយសង្គ្រោះបានល្អប្រសើរ បើប្រៀបធៀបទៅនឹងកាំភ្លើងធំផ្សេងទៀត»។

ប្រព័ន្ធនេះបាញ់គ្រាប់ផ្លោង១៥៥ មីល្លីម៉ែត្រនៅចម្ងាយរហូតដល់៤០គីឡូម៉ែត្រ នេះបើយោងតាមក្រុមហ៊ុន KNDS ។ កាំភ្លើងធំស្វ័យកម្ម CAESAR រាប់សិបគ្រឿង ត្រូវបានផ្គត់ផ្គង់ទៅឱ្យអ៊ុយក្រែន ចាប់តាំងពីការចាប់ផ្តើមឈ្លានពានពេញបន្ទុករបស់រុស្ស៊ី។

ទីក្រុងគីវ បានទិញកាំភ្លើធំរបស់ប្រទេសបារាំងជាច្រើនគ្រឿង ខណៈបារាំង ដាណឺម៉ាក និងប្រទេសផ្សេងទៀត ក៏បានផ្គត់ផ្គង់ដល់កងទ័ពអ៊ុយក្រែននូវកាំភ្លើងធំបាញ់ផ្លោងសេសា(CAESARS) នេះផងដែរ។ កាលពីនិទាឃរដូវឆ្នាំមុន ប្រទេសបារាំងបានសន្យាបន្ថែមទៀតថានឹងបញ្ជូនប្រព័ន្ធទាំងនេះដែលខ្លួននឹងផលិតនៅឆ្នាំ២០២៥ ទៅឲ្យអ៊ុយក្រែន។ ក្រុមហ៊ុន KNDS រំពឹងថាចំនួនសរុប១១៣គ្រឿងនឹងត្រូវបានបញ្ជូនទៅឲ្យអ៊ុយក្រែននៅចុងឆ្នាំនេះ។