​បាល់ទាត់៖ ​ក្រុមបាល់ទាត់​ជំរើសជាតិ​សេ​ណេ​ហ្កា​ល់​បាន​វិល​ត្រលប់ មក​ប្រទេស​កំណើត​របស់ខ្លួន​វិញនៅ​ថ្ងៃ​ចន្ទ​ម្សិលមិញ​ បន្ទាប់ពី​គ្រង​ជើងឯក​បាល់ទាត់​ទ្វីបអាហ្វ្រិក Africa Cup of Nations ជា​លើកដំបូង​ក្នុង​ប្រវត្តិសាស្ត្រ ​ក្រោយ​យកឈ្នះ​ជើងឯក ៧សម័យ​អេ​ហ្ស៊ី​ប​នៅ​វគ្គ​ផ្តាច់ព្រ័ត្រ​។

​​ប្រជាជន អ្នកគាំទ្រ​បាល់ទាត់​សេ​ណេ​ហ្កា​ល់​បានទទួល​ស្វាគមន៍​ក្រុម​របស់លោក Aliou Cisse នៅ​ទី​រដ្ឋធានី Dakar ប្រទេស​សេ​ណេ​ហ្កា​ល់​ដូច​វីរ​បុរស​ចំពោះ​សមិទ្ធិផល​ដ៏​អស្ចារ្យ​មួយ​នេះ​។ ​​សូម្បី​ប្រធានាធិបតី​សេ​ណេ​ហ្កា​ល់​លោក Macky Sall ក៏បាន​ឈរ​ចាំ​ទទួល​ក្រុម​សេ​ណេ​ហ្កា​ល់​ផងដែរ​នៅឯ​ព្រលានយន្តហោះ​។ ​​សេ​ណេ​ហ្កា​ល់​ក្រោម​ការដឹកនាំ​របស់​គ្រូបង្វឹក Aliou Cisse បាន​ទទួលរង​ការរិះគន់​ខ្លាំង​នៅ​ពេល​ចាប់ផ្តើម​ព្រឹត្តិការណ៍ Africa Cup of Nations ដំបូង​បន្ទាប់ពី​ឈ្នះ​តែ ១ប្រកួត ​និង​ស្មើ ២ប្រកួត មុនពេល​ទំលាក់​កាប់​វែ​រ​នៅ​វគ្គ ១៦ក្រុម ទំលាក់​អេក្វាទ័រ​ហ្គី​ណេនៅ​វគ្គ ៨ក្រុម​ និង​ទំលាក់បូ​គី​ណា​ហ្វា​សូ​នៅ​វគ្គ​ពាក់កណ្តាល​ផ្តាច់ព្រ័ត្រ​។ ​​រំលឹកថា ​សេ​ណេ​ហ្កា​ល់​ធ្លាប់​ឡើង​វគ្គ​ផ្តាច់ព្រ័ត្រ Africa Cup of Nations នេះ​ពីរលើក​រួចមកហើយ​តែ​សុទ្ធតែ​ចាញ់​នៅ​វគ្គ​ផ្តាច់ព្រ័ត្រ​ដែល​រួមមាន​ឆ្នាំ២០០២ ចាញ់​កា​មេ​រូ​ន និង​ឆ្នាំ២០១៩ ចាញ់​អាល់​ហ្សេ​រី​៕

​អត្ថបទ​៖​នាង សុភា​វុ​ធ