យោងតាមឯកសារដែលមើលឃើញដោយសារព័ត៌មានរ៉យទ័រ និងប្រភពដែលដឹងពីរឿងនេះ បាននិយាយនៅថ្ងៃអង្គារ (២១ តុលា) នេះថា រដ្ឋាភិបាលជប៉ុន និងរោងចក្រផលិតធំៗជាច្រើនរបស់ប្រទេសនេះ បានចេញសេចក្ដីព្រមានប្រាប់វៀតណាមថា ផែនការដាក់បម្រាម ហាមមិនឱ្យជិះទោចក្រយានយន្ត (ម៉ូតូ) ដែលប្រើសាំងក្នុងទីក្រុងហាណូយ អាចធ្វើឱ្យកម្មករជាច្រើនបាត់បង់ការងារ ហើយរំខានតម្លៃទីផ្សារ ៤,៦ពាន់លានដុល្លារអាមេរិក ដែលផលប៉ះពាល់ខ្លាំងជាងគេគឺក្រុមហ៊ុនហុងដា។

កាលពីខែកក្កដា នាយករដ្ឋមន្រ្តីវៀតណាម លោក Pham Minh Chinh បានចេញសេចក្ដីណែនាំមួយ ហាមប្រាមម៉ូតូដែលចាក់សាំង មិនឱ្យជិះចូលទីក្រុងហាណូយ ចាប់ពីពាក់កណ្ដាលឆ្នាំ២០២៦ តទៅ ខណៈប្រទេសនេះព្យាយាមកាត់បន្ថយការបំពុលខ្យល់។ ការរឹតត្បិតកាន់តែទូលំទូលាយ នឹងដាក់ចេញពេញលេញនៅឆ្នាំ២០២៨ ហើយបម្រាមនេះត្រូវរំពឹងថានឹងពង្រីកទៅផ្នែកផ្សេងទៀតទូទាំងប្រទេស។

ជាការឆ្លើយតប ស្ថានទូតជប៉ុននៅទីក្រុងហាណូយ បានផ្ញើលិខិតមួយទៅអាជ្ញាធរវៀតណាម ដោយនិយាយថា ការហាមប្រាមភ្លាមៗបែបនេះ អាចនឹង “ប៉ះពាល់ការងារដែលគាំទ្រដល់ឧស្សាហកម្ម” ក៏ដូចជាអ្នកចែកចាយម៉ូតូ និងផ្គត់ផ្គង់គ្រឿងបន្លាស់ផ្សេងទៀត នេះបើតាមសេចក្ដីថ្លែងការណ៍ពីស្ថានទូត ដែលសង្ខេបខ្លឹមសារលិខិតនោះ ដោយបដិសេធមិនបញ្ចេញសេចក្ដីលម្អិតឡើយ។

គួរឱ្យដឹងថា ទីផ្សារទោចក្រយានយន្តរបស់វៀតណាម គឺធំបំផុតលើពិភពលោក -- ដែលមានតម្លៃប៉ាន់ស្មាន ៤,៦ពាន់លានដុល្លារអាមេរិក យោងតាមទិន្នន័យស្រាវជ្រាវទីផ្សារពីស្ថាប័ន Mordor Intelligence --- ជាមួយនឹងចំនួនម៉ូតូដែលបានចុះបញ្ជីកាលពីឆ្នាំមុន ឈានដល់ ៨០% នៃចំនួនប្រជាជនសរុប ១០០លាននាក់របស់ខ្លួន ដែលជាអត្រាកម្មសិទ្ធិខ្ពស់បំផុតមួយនៅទូទាំងពិភពលោក៕