ប្រធានាធិបតីឥណ្ឌូនេស៊ី លោក Prabowo Subianto ចូលឆ្នាំទី២ នៃការកាន់តំណែងកំពូលរបស់លោក ដោយត្រូវជួបនឹងបញ្ហាប្រឈមជាច្រើន ដូចជាកំណើនសេដ្ឋកិច្ចមិនជាខ្លាំងក្លា ភាពអត់ការងារធ្វើរបស់យុវជនខ្ពស់ខ្លាំង និងភាពមិនរលូននៃកម្មវិធីអាហារឥតគិតថ្លៃដែលមានតម្លៃរាប់ពាន់លានដុល្លារ។

ហើយឥឡូវនេះ ក្តីបារម្ភថ្មីមួយបានលេចឡើង នោះគឺថា ការថយចុះនៃការគាំទ្រពីសំណាក់អ្នកបោះឆ្នោត ជាទំហំដែលពិបាកនឹងវាស់វែង ដោយសារតែខ្វះលទ្ធផលស្ទង់មតិសាធារណៈអាចជឿទុកចិត្តបាន នៅក្នុងឆ្នាំដំបូងរបស់លោក។

អ្នកវិភាគនយោបាយ លោក Kevin O'Rourke បានលើកឡើងថា៖ «ការណ៍ដែលថា មិនមានលទ្ធផលស្ទង់មតិល្អ ត្រូវបានផ្សព្វផ្សាយជាសាធារណៈ ចាប់តាំងពីខែកុម្ភៈមក បង្ហាញថា ការស្ទង់មតិទាំងអស់ទំនងជាបានរកឃើញការធ្លាក់ចុះនូវការគាំទ្រ ចំពោះលោក Prabowo។ គ្មានស្ថាប័នស្ទង់មតិណាមួយ មានឆន្ទៈព្រមចេញផ្សាយនូវការរកឃើញដែលធ្វើឲ្យលោកប្រធានាធិបតីខឹងសម្បានោះឡើយ»។

យ៉ាងណាក្ដី ការលេចធ្លាយនូវការរកឃើញពីស្ថាប័នស្ទង់មតិដ៏គួរឲ្យទុកចិត្តមួយដែលត្រូវបានរាយការណ៍ដោយប្រព័ន្ធផ្សព្វផ្សាយក្នុងស្រុកជាច្រើន បានបង្ហាញថា ការគាំទ្រ ចំពោះលោក Prabowo នៅក្នុងខែកញ្ញា បានធ្លាក់ចុះប្រហែល ៥៩ភាគរយ ពោលគឺថយចុះពីកម្រិត ៧៩ភាគរយ នៅដើមឆ្នាំ២០២៥ នេះ។ តែស្ថាប័ន Indikator Politik Indonesia បានបញ្ជាក់បន្ទាប់ពីនោះថា ខ្លួនមិនបានបញ្ចេញលទ្ធផលនៃការស្ទង់មតិនោះទេ។

ចំណែកក្រុមស្រាវជ្រាវមួយផ្សេងទៀត គឺមជ្ឈមណ្ឌលសិក្សាសេដ្ឋកិច្ច និងច្បាប់ កាលពីថ្ងៃចន្ទ (ទី២០ ខែតុលា) បានផ្តល់ពិន្ទុដល់ប្រធានាធិបតី ៣ពិន្ទុ ក្នុងចំណោម ១០ពិន្ទុ នៅក្នុងរបាយការណ៍លទ្ធផលការងារមួយឆ្នាំរបស់ខ្លួន ពោលគឺធ្លាក់ចុះពី ៥ពិន្ទុ អំឡុងរយៈពេលកាន់តំណែង ១០០ថ្ងៃ។ ការស្ទង់មតិដ៏គួរឲ្យជឿជាក់ចុងក្រោយមួយដែលបានចេញផ្សាយ បានធ្វើឡើងនៅរយៈពេលកាន់តំណែង ១០០ថ្ងៃ នៅពេលដែលស្ថាប័ន Litbang Kompas បានរកឃើញប្រជាប្រិយភាពរបស់លោក Prabowo ឡើងដល់ទៅ ៨១ភាគរយ ដែលខ្ពស់ជាងអ្នកកាន់តំណែងមុនរបស់លោក នៅក្នុងដំណាក់កាលដូចគ្នា សម្រាប់តំណែងប្រធានាធិបតី៕