ប្រទេសប៊ុលហ្គារីបានបង្ហាញពីការត្រៀមបើកដែនអាកាសរបស់ខ្លួន សម្រាប់ប្រធានាធិបតីរុស្ស៊ី លោក Vladimir Putin ប្រសិនបើលោកធ្វើដំណើរទៅកាន់ទីក្រុង Budapest ប្រទេសហុងគ្រី សម្រាប់កិច្ចប្រជុំកំពូល ដែលអាចកើតមានជាមួយប្រធានាធិបតីអាមេរិក លោក Donald Trump។ ការប្រកាសនេះត្រូវបានធ្វើឡើងដោយរដ្ឋមន្ត្រីការបរទេសប៊ុលហ្គារី លោក Georg Georgiev កាលពីថ្ងៃចន្ទ (ទី២០ ខែតុលា) ក្នុងអំឡុងពេលមានកិច្ចប្រជុំក្រុមប្រឹក្សាកិច្ចការបរទេសរបស់សហភាពអឺរ៉ុប (EU) នៅលុចសំបួរ។

លោករដ្ឋមន្ត្រី Georgiev បានសង្កត់ធ្ងន់ថា ការរៀបចំផ្នែកភ័ស្តុភារ នឹងត្រូវបានពិភាក្សាតែនៅពេលដែលកាលបរិច្ឆេទ សម្រាប់កិច្ចប្រជុំ ត្រូវបានបញ្ជាក់ជាផ្លូវការប៉ុណ្ណោះ។ លោកបានបញ្ជាក់ថា៖ «សូមឲ្យកាលបរិច្ឆេទត្រូវបានប្រកាសជាមុនសិន ហើយបន្ទាប់មកយើងអាចនិយាយពីព័ត៌មានលម្អិតបច្ចេកទេស។ តាមដែលខ្ញុំដឹង គឺមិនទាន់មានកាលបរិច្ឆេទបញ្ជាក់នៅឡើយទេ»។

លោករដ្ឋមន្ត្រីរូបនេះ បានគូសបញ្ជាក់ពីការប្តេជ្ញាចិត្តរបស់ប៊ុលហ្គារី ក្នុងការគាំទ្រគំនិតផ្តួចផ្តើមការទូតនានា ក្នុងគោលបំណងសម្រេចបានសន្តិភាព នៅអ៊ុយក្រែន។ លោក Georgiev បានពន្យល់ថា «នៅពេលដែលកិច្ចប្រឹងប្រែង ត្រូវបានធ្វើឡើង ដើម្បីសន្តិភាព វាគឺជារឿងសមហេតុសមផលដែលភាគីទាំងអស់រួមចំណែក ក្នុងការជួយជ្រោមជ្រែងឲ្យកិច្ចប្រជុំបែបនេះអាចប្រព្រឹត្តទៅបាន»។ ចំពោះសំណួរនៃការផ្តល់ច្រករបៀងផ្លូវអាកាសដល់លោក Putin លោកបានបន្ថែមថា៖ «ហើយតើកិច្ចប្រជុំនោះអាចកើតឡើងយ៉ាងដូចម្ដេច ប្រសិនបើអ្នកចូលរួមម្នាក់មិនអាចធ្វើដំណើរទៅដល់ទីនោះបាន?»

គួរបញ្ជាក់ថា លទ្ធភាពនៃការធ្វើដំណើររបស់ប្រធានាធិបតីរុស្ស៊ី លោក Vladimir Putin ទៅកាន់ទីក្រុង Budapest សម្រាប់ជំនួបកំពូលជាមួយប្រធានាធិបតីអាមេរិក លោក Donald Trump ជួបប្រទះបញ្ហាប្រឈមផ្នែកការទូត និងភ័ស្តុភារសំខាន់ៗ។ ដោយសារតែមានដីកាចាប់ខ្លួនពីតុលាការព្រហ្មទណ្ឌអន្តរជាតិ លោក Putin មិនអាចចូលដែនអាកាសរបស់សហភាពអឺរ៉ុប ឬអង្គការណាតូដោយសេរីបានឡើយ ដែលទាមទារឲ្យមានផ្លូវជំនួស និងការរៀបចំច្រករបៀងអាកាសពិសេស៕