អតីតប្រធានាធិបតីបារាំង លោក Nicolas Sarkozy នឹងត្រូវចូលទៅក្នុងពន្ធនាគារ នាថ្ងៃអង្គារ (ទី២១ ខែតុលា) នេះ ដោយចាប់ផ្តើមអនុវត្តរយៈពេលជាប់តោស ៥ឆ្នាំ ជុំវិញបទរួមគំនិតប្រមូលមូលនិធិធ្វើយុទ្ធនាការបោះឆ្នោតពីប្រទេសលីប៊ី ដោយនេះជាការបាត់បង់នូវកិត្តិយសដ៏គួរឲ្យភ្ញាក់ផ្អើលរបស់មេដឹកនាំដែលធ្លាប់ត្រូវបានគេស្គាល់ដោយសារតែការមានទំនុកចិត្តខ្ពស់ និងចំណង់ចំណូលចិត្តរបស់លោក សម្រាប់ការចាប់អារម្មណ៍ជាសកល។

លោក Sarkozy ដែលជាប្រធានាធិបតីអភិរក្សនិយមរបស់ប្រទេសបារាំង ចន្លោះឆ្នាំ២០០៧ ដល់ឆ្នាំ២០១២ នឹងក្លាយជាអតីតមេដឹកនាំបារាំងដំបូងគេដែលជាប់ពន្ធនាគារ គិតចាប់តាំងពីអ្នកចូលដៃជាមួយរបបណាហ្ស៊ី លោក Marshal Philippe Petain ក្រោយសង្គ្រាមលោកលើកទី២។

នៅមុនការជាប់ឃុំរបស់លោក លោក Sarkozy បានប្រាប់សារព័ត៌មាន La Tribune Dimanche ថា៖ «ខ្ញុំមិនខ្លាចពន្ធនាគារនោះទេ ខ្ញុំនឹងដើរដោយមានទំនុកចិត្ត ក្នុងនោះរួមទាំងនៅច្រកទ្វារពន្ធនាគារផងដែរ»។

ការផ្ដន្ទាទោសនេះបញ្ចប់ការតស៊ូផ្លូវច្បាប់ជាច្រើនឆ្នាំ ជុំវិញការចោទប្រកាន់ថា យុទ្ធនាការឆ្នាំ២០០៧ របស់លោក បានយកលុយរាប់លានពីមេដឹកនាំលីប៊ី លោក Muammar Gaddafi ដែលក្រោយមកត្រូវបានផ្ដួលរំលំ និងសម្លាប់ ក្នុងអំឡុងពេលមានការបះបោរ Arab Spring។

ទោះបីជាលោក Sarkozy ត្រូវបានរកឃើញថា មានទោសពីបទរួមគំនិតជាមួយជំនួយការជិតស្និទ្ធ ដើម្បីរៀបចំគម្រោងនេះក៏ដោយ ក៏លោកត្រូវបានឲ្យរួចខ្លួនពីបទទួល ឬប្រើប្រាស់មូលនិធិដោយផ្ទាល់ខ្លួន។

លោកបានបដិសេធជានិច្ចថា មិនបានប្រព្រឹត្តខុសឡើយ ហើយបានចាត់ទុកករណីនេះថា មានហេតុផលនយោបាយ ដោយនិយាយថា ចៅក្រមកំពុងប្រឹងប្រែងធ្វើឲ្យលោកអាប់ឱន។ លោកបានប្តឹងឧទ្ធរណ៍ ប៉ុន្តែប្រភេទនៃការកាត់ទោសលោក មានន័យថា លោកត្រូវតែជាប់ពន្ធនាគារ ខណៈដែលដំណើរការប្តឹងឧទ្ធរណ៍របស់លោក ស្ថិតក្នុងការពិចារណា៕