ព្រះចៅកាតាដែលជាអ្នកសម្រុះសម្រួលដ៏សំខាន់ សម្រាប់បទឈប់បាញ់ដែលកំពុងបន្តមាននៅតំបន់ហ្កាហ្សា បានចោទប្រកាន់អ៊ីស្រាអែលថា បានរំលោភលើកិច្ចព្រមព្រៀងទើបមានអាយុកាល ១១ថ្ងៃនេះ បន្ទាប់ពីបានបើកការវាយប្រហាររបស់ខ្លួនជាបន្តបន្ទាប់ទៅលើដែនដីនេះ។

ក្នុងសុន្ទរកថាប្រចាំឆ្នាំទៅកាន់ស្ថាប័ននីតិប្បញ្ញត្តិនៃក្រុមប្រឹក្សា Shura នាថ្ងៃអង្គារ (ទី២១ ខែតុលា) នេះ ព្រះចៅ Sheikh Tamim bin Hamad Al Thani បានមានព្រះបន្ទូលថា៖ «យើងសូមបញ្ជាក់ឡើងវិញនូវការថ្កោលទោសរបស់យើង ចំពោះរាល់ការបំពាន និងការអនុវត្តរបស់អ៊ីស្រាអែល នៅក្នុងដែនដីប៉ាឡេស្ទីន ជាពិសេសការធ្វើឲ្យតំបន់ហ្កាហ្សាស្ទ្រីបប្រែទៅជាទីកន្លែងមិនអំណោយផលដល់ជីវិតមនុស្ស (ហើយ) បន្តរំលោភលើបទឈប់បាញ់»។

ក្រុមតស៊ូប៉ាឡេស្ទីន គឺហាម៉ាស ក៏ធ្លាប់បានអំពាវនាវដល់តួអង្គអន្តរជាតិឲ្យដាក់សម្ពាធលើអ៊ីស្រាអែលគោរពបទឈប់បាញ់ នៅតំបន់ហ្កាហ្សា ដែលបានព្រមព្រៀងគ្នាកាលពីថ្ងៃទី១០ ខែតុលា។ ការវាយប្រហារតាមអាកាសរបស់អ៊ីស្រាអែល បានសម្លាប់ជនជាតិប៉ាឡេស្ទីនប្រហែល ១០០នាក់ គិតចាប់តាំងពីមានកិច្ចព្រមព្រៀងបទឈប់បាញ់ ហើយជាង ២០០រយនាក់ផ្សេងទៀតរងរបួស។

ក្រុមនេះបានបញ្ជាក់ថា ខ្លួនកំពុងធ្វើការ ដើម្បីប្រគល់ត្រឡប់វិញនូវអដ្ឋិធាតុរបស់ចំណាប់ថ្នូរអ៊ីស្រាអែល បើទោះបីជាមានឧបសគ្គធំៗ ការវាយប្រហាររបស់អ៊ីស្រាអែលលើទីតាំង និងគំនរថ្មបាក់បែកក៏ដោយ។ ក្រុមហាម៉ាស បានដោះលែងចំណាប់ថ្នូរនៅរស់ចំនួន ២០រូប និងបានប្រគល់អដ្ឋិធាតុ ១៣នាក់ ជាថ្នូរនឹងអ្នកទោសប៉ាឡេស្ទីនជិត ២.០០០នាក់៕